Dala suńqary-2024: Jambylda Qazaqstan men Qyrǵyzstannyń áskerı oqý-jattyǵýy aıaqtaldy
TARAZ. KAZINFORM – Jambyl oblysynda bir aptaǵa sozylǵan Qazaqstan men Qyrǵyzstan Qarýly Kúshteriniń «Dala suńqary-2024» birlesken taktıkalyq oqý-jattyǵýy aıaqtaldy.
Oqý-jattyǵýdyń sońǵy kezeńine «Ońtústik» óńirlik qolbasshylyǵynyń qolbasshysy general-maıor Qýanyshbek Úshtaev pen Qyrǵyz Respýblıkasy Qarýly Kúshteri Bas shtabynyń ókili polkovnık Ádil Keńes ýlý qatysty.
«Oqý-jattyǵý taktıkalyq epızodpen aıaqtaldy. Jattyǵý barysynda Qazaqstan men Qyrǵyzstan áskerı qyzmetshileriniń aralas kontıngenti ımıtatsııalanǵan jaýdyń bazalyq aýdanynda órt reıdin júrgizip, ony joıdy. Bul oqý-jattyǵýdy uıymdastyrmas buryn eki eldiń áskerı qyzmetshileri on kún boıy praktıkalyq jattyǵýlar ótkizip, ózderiniń kásibı daǵdylaryn shyńdady. Birikken toptarda olar ımıtatsııalanǵan jaýdyń bazalyq lagerin anyqtaý úshin Talas jotasynyń búkil taýly aımaǵyn aralap shyqty. Taýly aımaqta tapsyrmalardy oryndaı otyryp, toptar qadaǵalap otyrý ónerin paıdalanyp, qarsylasty tań qaldyratyndaı etip manevr jasady», – deıdi «Ońtústik» óńirlik qolbasshylyǵy barlaý bóliminiń bastyǵy polkovnık Erbol Serǵazın.
Polkonıktiń aıtýynsha, bizdiń jaýyngerlerimiz de, Qyrǵyzstannyń Qarýly Kúshteri de, jalpy qurama bólimder belgilengen jaýyngerlik oqý-jattyǵý tapsyrmalary men júktelgen mindetterdi tolyǵymen oryndap shyqqan.
Oqý-jattyǵýǵa Qazaqstannan taý qoryqshylar polkimen qatar, Áskerı-áýe kúshteriniń ókilderi de qatysqan. Sondaı-aq, bul jıynǵa Shymkent avıabazasynyń ushqyshtary men Taraz ushqyshsyz ushý júıelerin jaýyngerlik paıdalaný ortalyǵynyń operatorlary da atsalysqan.
«Bul oqý-jattyǵýdyń negizgi maqsattary men mindetteri, birinshiden, memleketterimiz ben Qarýly Kúshter arasynda dostyq qarym-qatynas ornatý, ekinshiden tájirıbe almasý boldy. Eki memlekettiń Qarýly Kúshteri bizdiń tutastyǵymyzdy, aýmaqtarymyz ben shekaralarymyzdyń tutastyǵyn saqtaý úshin qoldan kelgenniń bárin jasaýy tıis», – dep atap ótti Ońtústik óńirlik qolbasshylyǵynyń qolbasshysy general-maıor Qýanyshbek Úshtaev.
Oqý-jattyǵýdyń sońynda eki tarap ózara estelik syılyqtarmen almasyp, úzdik nátıje kórsetken áskerıler arnaıy Alǵys hattarmen marapattaldy.
«Qyrǵyz Respýblıkasy Qarýly Kúshteri basshylyǵynyń atynan Qazaqstan Qarýly Kúshteriniń, ásirese «Ońtústik» óńirlik qolbasshylyǵynyń basshylyǵyna «Dala sunqary-2024» birlesken taktıkalyq arnaıy oqý-jattyǵýyn uıymdastyrǵany jáne ótkizgeni úshin alǵysymdy bildirgim keledi. Bul oqý-jattyǵý halyqaralyq terrorızm men ekstremızm kórinisimen kúresýge múmkindik beredi. Oqý-jattyǵýǵa qatysýshylar úlken tájirıbe jınady, ózara baılanys nyǵaıa tústi dep esepteımin», – dedi Qyrǵyz Respýblıkasy Qarýly Kúshteri Bas shtabynyń ókili polkovnık Ádil Keńes ýlý.
Oqý-jattyǵýdyń jabylý saltanatynda qyrǵyz tarapy sonymen qatar, taý-ken qazylar polkiniń komandıri podpolkovnık Almas Otynshınovqa aıryqsha alǵystaryn bildirdi.
