DALA SK qurylys kompanııasy lıtsenzııasyz jumys istegen
ASTANA. KAZINFORM – Semeıde DALA SK qurylys kompanııasy 66 úleskerdiń senimine kirip, qomaqty qarajatty jymqyrǵan. Bul týraly «Jibek Joly» telearnasynyń tikeleı efırinde aıtyldy.
– Qazirgi ýaqytta bizdiń Ekonomıkalyq tergep-tekserý departamenti Abaı oblysy boıynsha is júrgizip jatyr. Іs 2024 jyldyń 30 mamyrynan bastap Qylmystyq kodekstiń 214-baby (zańsyz kásipkerlik), 190-baby (alaıaqtyq), 218-baby (zańsyz kiristerdi zańdastyrý) boıynsha tergelýde. Búgingi kúni 62 úleskerden jalpy somasy 1 mlrd 43 mln teńge kóleminde qarajat jınalǵan, - dedi QR QMA Tergeý departamenti basshysynyń orynbasary Kenesary Baǵbanuly.
Onyń aıtýynsha, bul iske qatysty Djýmagýlov Daýren kúdikti retinde tanylyp, qamaýǵa alynǵan.
– Kompanııa atalaǵan tulǵanyń atyna tirkelmegen. Ol kásipti óziniń senimdi adamdarynyń atyna rásimdep qoıǵan. Qazirgi ýaqytta shamamen 215 mln teńge kóleminde onyń múlkine, sondaı-aq 151 mln teńgeniń qurylys materıaldaryna tyıym salyndy. Sonymen qatar salymshylardyń aqshasyn qaıtarý baǵytynda jumystar júrgizilip jatyr, - dedi ol.
Semeı qalasynyń turǵyny 2020 jyldan beri baspana alýdy armandap júrgenin, sol maqsatpen kompanııaǵa aqsha salǵanyn aıtty.
– 66 úleskerdiń qatarynda zeınetkerler, jalǵyzbasty analar jáne múgedekter bar. Biraq Semeı qalasynyń ákimdigi nege bul kompanııanyń zańdylyǵyn teksermedi? Bul – biz úshin úlken suraq, - dedi ol.
Tergeýshiniń aıtýynsha, kompanııanyń qurylys júrgizýge jáne úleskerlerden aqsha jınaýǵa ruqsaty bolmaǵan. Soǵan qaramastan, ol óz jumysyn jalǵastyra bergen.
– 2024 jyldyń qarashasynda kompanııa ákimshilik jaýapkershilikke tartylǵanymen, zańsyz qyzmetin toqtatpaǵan, - dedi ol.
Kenesary Baǵbanulynyń aıtýynsha, 2024 jyldan beri 11 epızodtan turatyn 9 qylmystyq is tirkelip, 1 200 úleskerden aqsha jınalǵan.
– Osy ister aıasynda jalpy 12 mlrd teńge zalal keltirilgen. Onyń ishinde 8 mlrd teńge tárkilenip, zalaldyń jartysynan kóbi óteldi, - dedi ol.
Buǵan deıin, Qazaqstanda qurylys barysyn dron jáne jasandy ıntellektiniń kómegimen baqylaıttynyn jazǵanbyz.