«Dala sazy» onlaın-radıosy iske qosylady
ASTANA. QazAqparat - «Dala sazy» onlaın-radıosy iske qosylady. Bul týraly búgin Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda QR Prezıdenti Ákimshiligi ishki saıasat bóliminiń meńgerýshisi Aıda Balaeva aıtty, dep habarlaıdy QazAqparat.
«Otandyq ádebıetti joǵary deńgeıde tanystyrýǵa qabiletti jas talanttar men týyndylardy anyqtaý baǵytyndaǵy jumystar da júrgizilýde. Máselen, 2017 jyly Birinshi «Rýh» halyqaralyq ádebı konkýrs uıymdastyryldy. 8 elden myńnan astam ótinim kelip tústi. Bul shara ádebıet salasyndaǵy mádenıetaralyq ózara is-qımyldy jandandyrýǵa múmkindik berdi. Aǵymdaǵy jyly Italııa, Frantsııa, Ulybrıtanııa, Ispanııa syndy elderge gastróldik týrlar uıymdastyryp, opera-balet qoıylymdaryn, mýzeı kórmelerin, mýzykalyq ansamblderdiń óner kórsetýlerin ótkizý kózdelip otyr», - dedi Aıda Balaeva.
Onyń aıtýynsha, úzdik qazaqstandyq mýzykalyq týyndylarǵa tsıfrly formattaǵy qoljetimdikti qamtamasyz etetin Dalatunes - ınternet-resýrs jobasy iske asyryldy. 2017 jyldyń ishinde 13 myń mýzykalyq týyndy, 1,2 myń nota jáne 1,7 myń akkord júkteldi.
«Dala sazy» onlaın-radıo jobasy ázirlenip, iske qosý kezeńinde tur. Ol otandyq jáne sheteldik aýdıtorııaǵa túrli janrdaǵy qazaqstandyq mýzykany tanystyryp, qazirgi zamanǵy tanymal avtorlarmen, oryndaýshylarmen suhbattar usynatyn bolady. Ol úshin aǵylshyn tildi kontentte qarastyrylǵan»,- dedi ol.
Aıda Balaevanyń sózine qaraǵanda, elordanyń mádenı ortalyq mártebesin qalyptastyrý úshin aǵymdaǵy jyldyń shilde aıynda qazirgi zamanǵy ónerdiń Astana bıennalesin ótkizý jumystary júrgizilýde.
«Qazirgi ýaqytta tanymal ónertanýshylarmen jáne halyqaralyq sarapshylarmen Qazaqstannyń beıneleý óneri katalogyna kiretin týyndylarǵa saraptama júrgizilýde», - dedi ishki saıasat bóliminiń meńgerýshisi.
Óz kezeginde QR Prezıdenti Ákimshiliginiń basshysy, Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń tóraǵasy Ádilbek Jaqsybekov oblys ákimderine «Jahandyq álemdegi qazirgi zamanǵy mádenıet» jobasyn júzege asyrý aıasynda jergilikti ujymdardyń gastrolderin, kórkemsýret kórmelerin uıymdastyrý jumystaryn kúsheıtýdi tapsyrdy.
