Dala órtinen keıin Óskemendi tútin basyp qaldy
ÓSKEMEN. QazAqparat - Ertis ózenindegi aralda qurǵaq shóp otqa oranda, qazir jalynmen órt sóndirýshiler kúresip jatyr, dep habarlaıdy QazAqparat tilshisi Shyǵys Qazaqstan oblysy TJD-nyń baspasóz qyzmetine silteme jasap.
Órt sóndirýshilerdi oqıǵa ornyna Shyǵys óńirlik aeroutqyr jedel-qutqarý jasaǵynyń qutqarýshylary jetkizdi. Órt eshqaıda jaıylmaıdy, sebebi aınalasy sýmen qorshalǵan, alaıda kóp aýmaqty sharpyǵandyqtan, qoıý tútin kóterilip qala turǵyndarynyń mazasyn aldy.
Qazirgi ýaqytta órt aýyzdyqtalýda, órt sóndirýshiler sapalaq (órt sóndiretin qural-avt.) jáne arqaǵa asylatyn sóndirgish quraldy qoldanyp, jalyndy sóndirip jatyr. Kóbine qurǵaq shóp pen butalar otqa oranǵan. Jeke quramnyń 20 qyzmetkeri birneshe aýmaqqa bólinip, iske kiristi. Shyǵys óńirlik aeroutqyr jedel-qutqarý jasaǵy ózende qaıyqpen kezekshilik atqarýda. Shamamen 30 gektar aýmaqty jalyn sharpyǵan.
Aıta keteıik, demalys kúnderi oblysta ornaǵan ystyq, qurǵaq aýa raıy saldarynan órt sóndirýshiler 50 asa osyndaı dala órtin sóndirýge barǵan. Sońǵy ýaqytta, dala órti jıilep ketti jáne jel bolmaǵandyqtan keshke qaraı Óskemen qalasyn araldan kelgen tútin basty. Jaǵdaıdy terektiń úrpekteri ýshyqtyrýdy. Qaýipsizdik talaptaryn eskermegender jerge jınalyp qalǵan mamyqqa adamdar órt qoıady. Olar bul árekettiń soń nege uryndyratynyn oılap jatpaıdy. 
