Dala órti 400 tonna daıyn shópti jalmady
ASTANA. Qyrkúıektiń 10-y. QazAqparat - Qazaqstannyń eki oblysynda tutanǵan dala órti 400 tonna daıyn shópti jalmady, dep habarlady QR Tótenshe jaǵdaılar mınıstrliginiń baspasóz qyzmetinen.
Atap aıtqanda, Qaraǵandy oblysynyń Buqar jyraý aýdanyna qarasty «Arǵymaq» sharýa qojalyǵynyń 720 gektar shabyndyǵy órt qushaǵyna orandy. Apat saldarynan 200 tonna daıyn shóp órtenip, ony sóndirmek bolǵan mehanızator kúıik shalyp, aýrýhanaǵa jetkizildi. Tilsiz jaý 7 saǵat ótkennen keıin ǵana aýyzdyqtaldy.
Al Shyǵys Qazaqstan oblysynyń Shemonaıha aýdanyndaǵy «Ertis tonýs plıýs» JShS-niń aýmaǵynda tutanǵan qyzyl jalyn 1200 sharshy metr aýmaqty qamtyp, 200 tonna shóp órtenip ketti. Zardap shekkender men qaza tapqandar joq. Órt QR TJM Shyǵys Qazaqstan oblystyq tótenshe jaǵdaılar departamenti órt sóndirý qyzmetiniń kúshimen aýyzdyqtaldy.
