Dala qyrany - 2012 jyldyń qusy
ALMATY. 30 qańtar. QazAqparat /Názıra Eleýhan/ - Qazaqstan bıoalýandyq saqtaý qaýymdastyǵy men Qazaqstan Qustardy qorǵaý odaǵynyń jetekshi ornıtologtarynyń birigip ótkizgen saýalnamasy nátıjesinde bıylǵy jyldyń qusy bolyp dala qyrany tańdaldy.
2006 jyldan bastaý alǵan atalmysh shara bıyl 7-shi ret ótkizilip otyr. Osy sııaqty sharalar Belarýs, Reseı, Ýkraına, Germanııa, Jańa Zelandııa, Estonııa, Ózbekstan jáne taǵy da basqa elderde dástúr retinde ótkizilip turady.
Atalmysh sharaǵa oraı uıymdastyrýshylar bıylǵy jyly dala qyrandaryna kóńil aýdarý maqsatynda sýret, foto baıqaýlar syndy ár túrli sharalardy ótkizýdi josparlaýda.
Qazaqstanda dala qyrany keń dalanyń sımvoly bolyp tabylady. Sondyqtan bolar ár qazaqstandyq ony jaqsy biledi. Búginde dala qyrany elimizdiń birqatar aýmaǵynda mekendeıdi. Ókinishke oraı, sońǵy jyldary onyń sany edáýir azaıǵan. Oǵan joǵary voltti elektr jelileri, brakonerlik, úıde ustaý úshin zańsyz aýlaý, tulyp jasaý maqsatyndaǵy atý jáne t.b sebepter áser etýde.
Sondyqtan dala qyrany memlekettiń erekshe qorǵaýyna alynǵan jáne Qazaqstannyń Qyzyl kitabyna engizilgen.
