«Dala qyrandary» teleserıaly halyqaralyq baıqaýlarda baq synaıdy
NUR-SULTAN. QazAqparat – Áskerı ushqyshtardyń ómiri men qyzmetin dáripteıtin otandyq «Dala qyrandary» teleserıaly halyqaralyq festıvalderge qatysady. Bul týraly «Habar» agentiniń bas prodıýseri Aıdos Turysbek QazAqparat tilshisine bergen suhbatynda aıtyp berdi.
«Teleserıal 25 qarashadan bastap «Habar» arnasynan dúısenbi – beısenbi kúnderi keshki saǵat 22:30-da kersetiledi. Serıaldyń janry áskerı-drama. Jáne aldaǵy ýaqytta «Habar»-ǵa qarasty telearnalardan da kórsetetin bolamyz. Joba eki mınıstrliktiń birlesýimen túsirildi jáne ol 12 serııadan turady. Sondaı-aq, atalǵan serıaldy halyqaralyq kınofestıvalder men baıqaýlarǵa qatystyrý josparda bar. Buǵan deıin bizdiń arnamyzdyń týyndysy «Altynshy beket» teleserıaly «Toffı» syılyǵyn jeńip aldy. Qazaqstannyń áýe kúshteriniń áleýetin kórsetetin mundaı patrıottyq fılmder sheteldik kórermenderge qyzyq bolady dep oılaımyn», - dedi A. Turysbek.
Sondaı-aq, bas prodıýser shetelden suranys bolsa, serıaldy halyqaralyq prokatqa shyǵarý jospary baryn da tilge tıek etti.
«Teleserıalǵa degen usynys, suranys bolyp jatsa aldaǵy ýaqytta halyqaralyq prokatqa shyǵarý oıda bar. Biraq aldymen otandyq kórermenderdiń yqylasyn baıqap kórgimiz keledi», - dedi ol.
Onyń aıtýynsha, telearnadan kórsetiletin fılmderdi halyqtyń qanshalyqty jyly qabyldaǵanyn anyqtaıtyn arnaıy reıtıngter bar jáne sol arqyly kórermender yqylasyn baıqaýǵa bolady.
Buǵan deıin jańa «Dala qyrandary» atty teleserıalynyń tusaýy kesilgenin habarlaǵan bolatynbyz.
Otandyq týyndynyń tusaýkeser rásimine QR Aqparat jáne qoǵamdyq damý mınıstri Dáýren Abaev pen QR Qorǵanys mınıstri Nurlan Ermekbaev qatysty.
