Dala qyrany balapanyn qorektendirip jatqan sát vıdeoǵa túsip qaldy
ASTANA. KAZINFORM — «Altyn-Emel» memlekettik ulttyq tabıǵı parki Instagram paraqshasyna erekshe vıdeo jarııalady. Onda dala qyrany Aquila nipalensis balapanyn qorektendirip jatqan sáti vıdeoǵa túsip qalǵan.
Dala qyranynyń kórý qabileti – onyń ashyq landshafttarda tirshilik etýge beıimdelgen eń mańyzdy bıologııalyq quraly. Ol adam kózinen 4-8 ese ótkir keledi, bul qusqa birneshe shaqyrym qashyqtyqtan usaq jemtikti baıqaýǵa qabiletti.
Dala qyrany Aquila nipalensis — qyrandar tuqymdasyna jatatyn iri jyrtqysh qus, ol negizinen Eýrazııanyń dala jáne shóleıt aımaqtarynda, sonyń ishinde Qazaqstan aýmaǵynda keń taralǵan. Onyń qanat qulashy shamamen 1,8–2,2 metrge deıin jetip, salmaǵy 2,5–5 kılogramm aralyǵynda bolady. Túsi kóbine qońyr reńkti bolyp keledi, jas qustardyń túsi ashyǵyraq, al eresekteri qoıýlaý reńkke ıe.
Bul qus ashyq dala men shóleıt jerlerdi mekendep, uıasyn kóbine jerge jaqyn jerlerge, jartasqa nemese sırek aǵashtarǵa salady. Onyń negizgi qoregi kemirgishter, ásirese sýyr men sarshunaq sııaqty janýarlar, sondaı-aq usaq sútqorektiler men keıde qustar bolyp tabylady, al azyq tapshy bolǵan jaǵdaıda óleksemen de qorektene alady.
Dala qyranynyń eń basty erekshelikteriniń biri — óte joǵary kórý qabileti, ol arqyly birneshe shaqyrym qashyqtyqtan qozǵalysty baıqap, jemtigin dál anyqtaı alady. Bul túrdiń kóp popýlıatsııalary jyl qusy bolǵandyqtan, kúzde jyly jaqqa ushyp ketip, kóktemde qaıta oralady. Keıbir óńirlerde sany azaıǵandyqtan, ol qorǵaýǵa alynǵan qustar qataryna jatady.
Buǵan deıin «Altyn Emelde» Qyzyl kitapqa engen dala qyranynyń eki uıasy anyqtalǵanyn jazǵan edik.
