«Dala daýysy» radıofestıvali jańa maýsymda dúnıejúzilik aýqymǵa qanat jaımaq - prodıýser Aınur Abaıqyzy

Bul týraly osy jobanyń prodıýseri Aınur Abaıqyzy málim etti.

Radıofestıvalǵa alǵashqy jyly qatysqan 130 oryndaýshyǵa radıotyńdaýshylardyń ınternet arqyly bergen daýystary jáne kásibı mýzyka mamandarynyń pikirleri negiz bolyp, úzdik dep tabylǵan 25 óner sańlaǵyna úsh atalym boıynsha «Dala daýysy» dep kórkem bezendirilgen arnaıy kádesyılar men dıplomdar tapsyryldy. Atap aıtsaq, «Estrada» atalymy boıynsha: Jubanysh Jeksenuly, Qydyráli Bolmanov, Qaraqat Ábildına, Dosymjan Tańatarov, Erbolat Qudaıbergenov, Tańat Mamyrhan, Allabergen Jaqsybaev, Gúlnur Orazymbetova, Baıan Nurmysheva, «Premıým» kvarteti, «Taraz» trıosy men «Báıterek» toby marapattalsa, «Dástúrli án» atalymy boıynsha: Elmura Jańabergenova, Serjan Musaıyn, Klara Tólenbaeva, Ómirqul Aınııazov, Quralaı Shaıahmetva, Saıa Esenkeldıeva, Aıgúl Elshibaeva tárizdi kúmis kómeı, maıtalman ánshiler anyqtaldy. Al festıvaldiń jańalyǵy retinde anyqtalǵan Gaýhar Myrzahmetova, Nurbolat Arzamas, Halyq Rızabek, Beısen Áýelhan, Aınur Qajymolla, Serkan men Zeınap Ózden, Manas Bıatandar «Jańa esim» atalymy boıynsha marapattaldy. Qorytyndy gala-kontsertte marapattalǵan barlyq ánshiler joǵarǵy deńgeıde óner kórsetti. Qytaıdan kelgen baýyrlarymyz ejelgi qazaqı ánderdi tamyljyta oryndaýmen erekshelense, Túrkııalyq Zeınap pen Serkannyń dýeti qazaq kórermenin «Balapan qaz» ánimen baýrap aldy. Al káris jigitterinen quralǵan «Premıým» kvarteti halyq áni «Nazqońyrdy» óte joǵary deńgeıde naqyshyna keltire oryndap, dúıim jurtty rıza etti. Bul baıqaý, túptep kelgende, buqaralyq aqparat quraldary ishindegi jedel de qoljetimdi túri sanalatyn radıonyń basty qarýy tek ótkir sóz ben ushqyr oı ǵana emes, sonymen qatar, qazaqtyń án mádenıetindegi barlyq salalardy qamtı otyryp, halyqtyń mádenı, rýhanı súranysyn da qanaǵattandyra alatyn aqparat kózi ekendigin kórsetip berdi.

Aınur Abaıqyzynyń aıtýynsha, bastamasy osylaı bastalǵan «Dala daýysy» radıofestıvali bıylǵy jyly da óz jalǵasyn taýyp, dúnıejúzi elderi arasynda ótkiziledi dep jarııalanyp, qazirgi tańda alǵashqy aınalymy Qazaq radıosynyń efırinde júrip jatyr. Festıvalda ándi jazýshy tulǵalar (kompozıtor, aqyn, aranjırovkashy) emes, tek oryndaýshylar ǵana marapattalmaq. Qatysýshylarǵa qazaqtyń halyq jáne halyq kompozıtorlarynyń ánderin (dástúrli ánder, akademııalyq baǵyttaǵy qazaq kompozıtorlarynyń ánderin (qazaq operalarynan arııalar, jekelegen ánder), zamanaýı ánderdi (estradalyq) túrli oryndaýshylyq mánerde (dástúrli, eýropalyq akademııalyq, estradalyq), túrli stılde (klassıkalyq, estradalyq, pop, rok, rep, hıp-hop t.b.) oryndaýǵa erkindik berilgen. Festıval dástúr boıynsha jeltoqsan aıynda qorytyndylanady dep josparlanýda. Festıvaldiń ótý jospary tómendegideı:

Tapsyrys bergen ánshiler dástúr, estrada, akademııalyq án nomınatsııalary boıynsha 20 shyǵarmadan toptastyrylyp, ár nomınatsııadaǵy árbir oryndaýshy týraly qysqasha málimet pen ánshi usynǵan bir án berilgen arnaıy rolıkter jasalady. Ol rolıkter Qazaq radıosy men «Shalqar» arnasynyń efırlerinen 3-4 apta boıy úzdiksiz nasıhattalyp, tyńdarman daýysyn jınaý úshin Qazaq radıosynyń www.kazradio.kz saıtyndaǵy «Dala daýysy» bólimine qoıylady. Saıttaǵy daýystar qorytyndysy ár aptanyń jumasy kúni saǵat 19.00 - 20.00 aralyǵynda Qazaq radıosynyń efırinde júretin «Dala daýysy - 2013 kúndeliginde» jarııalanyp, joba prodıýseri men mýzykalyq júrgizýshi Muhamedııar Rashaı tarapynan arnaıy saraptalady. Festıvaldiń negizi sharttarynyń biri - oryndalatyn ánniń tili qazaqsha bolýy. Eger, qatysýshy úmitkerler shet eldik ánshi bolsa, atalǵan úsh nomınatsııaǵa qatysty óz halqynyń ánin oryndaýǵa bolady, tek án mátinin qazaq tiline aýdaryp oryndaýy mindettelgen. Al qazaq ánin oryndasa nur ústine nur bolmaq. Sondaı-aq, usynylatyn ánge oryndaýshylyq, janrlyq, stıldik format jaǵynan shekteý koıylmaǵanymen, shyǵarma oryndaýshylyq, aranjırovkalyq, dybystyq turǵydan jańa izdeniske toly bolý kerek. Ondaǵy maqsat - qalyń tyńdarman tańdaýy men talǵamy joǵary mamandar talabyna salý arqyly Otandyq ánshilerdiń shyǵarmashylyq ósýine yqpal etip, qazaq ániniń shet elderde oryndalýyna talpynys jasaý. Sonymen qatar, festıvaldiń aımaqtyq aýqymyn arttyryp, shyǵarmashylyq izdenisin kúsheıtý, ıaǵnı aspaptyq óner túrlerin de qosý isteri josparlanýda.