«Dala daýysy» radıofestıvali aldaǵy ýaqytta da jalǵasatyn bolady - N.Muhamedjanova
ASTANA. 21 jeltoqsan. QazAqparat - «Dala daýysy» radıofestıvali aldaǵy ýaqytta da jalǵasatyn bolady. Bul týraly búgin «Dala daýysy» radıo festıvaliniń qorytyndy kontsertinde sóz sóılegen «Qazaqstan» teleradıo korporatsııasynyń basqarma tóraıymy Nurjan Muhamedjanova aıtty.
«Búgingi ótkizilip otyrǵan úlken qorytyndy kontsertimiz, bul osy Astanada 1 qazannan óz jumysyn bastaǵan 90 jyldyq tarıhy bar «Qazaq» radıosynyń jarqyn, este qalatyn, keıin urpaqtar altyn árippen jazatyn keremet bir dástúriniń bastamasy. Osy bir dástúrdi biz aldaǵy kezde de ári qaraı jalǵastyra beremiz degen senimdemiz. Óıtkeni halyq barda, tyńdarman barda qazaqtyń dástúrli óneri, onyń ishinde qazirgi kezdegi estradalyq janry eshqashan eskirmeıdi», - dep atap ótti ol.
Aıta keteıik, radıofestıvalge qatysqan 130 oryndaýshyǵa tyńdarman ǵalamtor arqyly daýys berip ári kásibı mýzyka mamandary pikirleri negizinde 50 ánshi ekinshi aınalymǵa ótti. Endi sol 50-diń ishinen úzdik shyqqan 25 óner sańlaǵyna 3 atalym boıynsha «Dala daýysy» festıvaliniń arnaıy dıplomy men kórkem bezendirilgen arnaıy kádesyılary berildi.
