«Dala dámi» aýyl sharýashylyǵy jármeńkesinde 400 tonnadan astam ónim usynylady
ASTANA. KAZINFORM — Osy aptada respýblıka boıynsha jármeńkelerge 7 568 tonna aýyl sharýashylyǵy ónimi shyǵaryldy. Onyń ishinde Astanada 400 tonnadan astam ónim usynylady. Bul týraly Saýda jáne ıntegratsııa mınıstrligi málim etti.
Qazaqstanda úshinshi apta qatarynan «Dala dámi» aýyl sharýashylyǵy jármeńkeleri ótip jatyr. Saýda jáne ıntegratsııa mınıstrliginiń qoldaýymen uıymdastyrylǵan jármeńkelerde otandyq fermerler óz ónimderin deldalsyz tikeleı tutynýshylarǵa usynady.
— Osy demalys kúnderi elordada Shyǵys Qazaqstan jáne Aqtóbe oblystarynyń sharýalary óz ónimderin usynady. Jármeńkelerde ónim baǵasy tıimdi. Ótken aptada birqatar taýarlary naryqtaǵy baǵadan 15-20 paıyzǵa arzan satyldy. Máselen, Astanada sıyr jáne jylqy etiniń kelisi 3 500 teńgeden usynylsa, Qostanaıda sıyr eti 3 200–3 500 teńge, jylqy men qoı eti 3 myń teńgeden bastaldy, — delingen vedomstvonyń habarlamasynda.
Jármeńkelerde et, sút ónimderi, kókónis pen jemis-jıdek, balyq, dándi daqyldar jáne basqa da otandyq ónimder usynylady. Et ónimderine suranys joǵary.
«Dala dáminiń» basty ereksheligi — fermerlerdiń ónimderin tikeleı satýy. Saýda oryndary jergilikti aýyl sharýashylyǵy óndirýshilerine tegin beriledi.
Jármeńkeler elimizdiń barlyq óńirinde ár demalys saıyn jalǵasady.
Aıta keteıik, buǵan deıin Astanada Mańǵystaý, Almaty jáne Abaı oblystary taýar óndirýshileriniń qatysýymen kezekti aýyl sharýashylyǵy jármeńkesi ótti.
