Energetıka mınıstri eldegi janarmaı qory týraly málimet berdi

ASTANA. KAZINFORM — Energetıka mınıstri Erlan Aqkenjenov Májilistegi elektrmen jabdyqtaý júıesin jetildirýge arnalǵan jıynnan keıin BAQ ókilderine eldegi janarmaıdyń qory týraly málimet berdi. 

— Aqpan aıynda memleket benzın men dızeldiń baǵasyn retteýden ketkenin bilesiz. Buǵan deıin de aıtqanymdaı baǵany ishtegi suranys, ishki usynys aıqyndaıdy. Qazirgi tańda benzın jetkilikti mólsherde, mol. Qatelespesem benzın qory 42 kúnnen asady. Sondyqtan benzın baǵasyn kóteretindeı negiz joq dep oılaımyn. Dızel otynyna kelsek, qory 28 kúnge jetedi. Dızel bolmaı qalady deıtindeı eshbir alańdaýshylyq joq. Aýylsharýashylyq taýar óndirýshilerdi dızelmen basymdyq negizinde qamtamasyz etip otyrmyz. Energetıka mınıstrligi ózi ataǵan kólemdi qamtamasyz etedi, qamtamsyz etip otyr da. Sondyqtan egis naýqanyna alańdap otyrǵan joqpyz. Jalpy janarmaı naryǵy artyǵymen teńgerimdi jaǵdaıda tur. Suranys pen usynys jetkilikti, — dedi Erlan Aqkenjenov.

Sondaı-aq, búgingi tańda elektr tarıfin kóterý máselesi de kún tártibinde joq ekenin aıtty.

— Jyl basynda elektr qýatynyń tarıfteri kóterilgen. Qatelespesem, eldegi negizgi elektr qýatyn generatsııalaıtyn 7 kásiporynda jaqyn ýaqytta tarıf kóterý máselesi kún tártibinde turǵan joq. Qazirgi tańda ondaı máseleni qarastyryp otyrǵan joqpyz, — dedi mınıstr.

Sondaı-aq, ótken aptada Energetıka mınıstrligi Ekibastuzda jańa elektr stantsııasyn salýǵa tender jarııalaǵan edi.