Dál qazirgi kúnde qazaq teatry rejıssýrasynda toqyraý bolyp turǵanyn ashyq aıtqanymyz durys - ónertanýshy Baqyt Nurpeıis
ALMATY. 26 naýryz. QazAqparat - Qazaq teatryndaǵy rejıssýralyq daǵdarys alańdatatyn jaǵdaıda. Bul týraly búgin Almatyda ótip jatqan «Qazaqstan teatrlary: búgini jáne bolashaǵy» dep atalatyn respýblıkalyq ǵylymı-tájirıbelik konferentsııada aıtyldy.
«Sońǵy 1 jyldyń ishindegi teatr repertýaryna kóz júgirtetin bolsaq, mynaý jurttyń aıtýly spektakli boldy dep aýyz toltyryp aıtatyndaı qoıylym jok ekeni belgili. Іrgeles jatqan qyrǵyz teatrynyń oq boıy ozyp ketkenin moıyndaý kerek. Olardyń Chehov festıvaline qatysýyn búkil Ortalyq Azııa teatrlary úshin eleýli mádenı oqıǵa dep baǵalaýymyz kerek», - deıdi T.Júrgenov atyndaǵy Qazaq ulttyq óner akademııasynyń professory, ónertaný doktory Baqyt Nurpeıis.
Kıno, televıdenıe jáne ónertaný fakýlteti dekanynyń aıtýynsha, keıbir oblystyq teatrlardyń kóptegen spektaklderi syn kótermeıdi. Onda battıyp turǵan kemshilik bolmaǵanmen, kórermendi tartpaıdy. Onyń sebebi rejıssýranyń dramatýrgııalyq shyǵarmany sahnalyq týyndyǵa aınaldyra almaýynda. Búgingi rejıssýralardyń birqatary akterlarmen jumys jasaýdy bosańsytyp alǵany baıqalady. Oblystyq teatrlardyń kópshiliginde burynnan qalyptasqan akterlik mekteptiń qojyraı bastaǵany da jasyryn emes. Aǵa, orta jáne jas býyn arasyndaǵy sabaqtastyq azaıyp bara jatyr.
