Dál búgingi kúni prezıdent retinde N. Nazarbaevqa balama kandıdatty kórip otyrǵan joqpyz - S. Geroev
ASTANA. 27 jeltoqsan. QazAqparat /Qanat Mámetqazyuly/ - Dál búgingi kúni prezıdent retinde Nursultan Nazarbaevqa balama kandıdatty kórip otyrǵan joqpyz.
Búgin Astana qalalyq Qazaqstan halqy Assambleıasynyń uıymdastyrýymen ótkizilgen «N. Nazarbaev - ult birligi men Qazaqstannyń jarqyn bolashaǵynyń negizin qalaýshy» taqyrybyndaǵy jıyn barysynda «Vaınah» sheshen-ıngýsh etnomádenı birlestiginiń tóraǵasy, Astana qalalyq Qazaqstan halqy Assambleıasy tóraǵasynyń orynbasary Salman Geroev osylaı málim etti.
Esterińizge sala keteıik, atalǵan jıyn QR Prezıdentiniń ókilettigin uzartý jóninde referendým ótkizý týraly bastamany qoldaý maqsatynda ótkizilip otyr.
«Meniń oıymsha, Qazaqstan memlekettik turaqtylyqta damyp, óziniń qaýipsizdigin, ultaralyq kelisimin odan saıyn jańǵyrta berýi úshin de Elbasy N. Nazarbaevtyń alǵa júktegen mindetterin oryndaýǵa tıispiz. Bundaı mindetterdiń barshasy memlekettik baǵdarlamalarda kórinis tapqan. Endeshe, ony oryndaýǵa eshteńe kedergi bolmaýy shart. Qandaı da saılaýlarǵa da alańdamaýymyz kerek. Sonymen bir kezekte biz eger prezıdenttik saılaý uıymdastyrylyp, oǵan N. Nazarbaevtyń kandıdatýrasy usynylatyn bolsa, sózsiz halyqtyń basym bóligi Elbasyna daýys beretinin sezemiz. Óıtkeni, biz dál osy kúni N. Nazarbaevqa balama kandıdatty kórip otyrǵan joqpyz», - dedi Astana qalalyq Qazaqstan halqy Assambleıasy tóraǵasynyń orynbasary Salman Geroev. Sonymen birge, aǵymdaǵy jylǵy jeltoqsannyń basynda ótken EQYU Astana Sammıtiniń Qazaqstan Prezıdentiniń mereıin taǵy bir márte ósirgenin aıtqan S. Geroev, bundaı aýqymdy sharanyń arqasynda Qazaqstannyń syrtqy saıası ustanymy nyǵaıa túskendigin atap ótti.
Esterińizge sala keteıik, búginnen QR Prezıdenti - Ult kóshbasshysy N.Á.Nazarbaevtyń prezıdenttik ókilettiligin 2020 jylǵy 6 jeltoqsanǵa deıin uzartý jónindegi referendýmnyń bastamashyl toby jumysqa kirisip otyr.
