«Dakardyń» jalpy esebinde qazaqstandyq ekıpaj taǵy eki satyǵa kóterildi
ASTANA. 18 qańtar. QazAqparat - Chılıdiń La-Serena qalasynda El-Salvadordan bastaý alǵan «Dakar-2014» rallı-marafonynyń 11-kezeńi máresine jetti, dep habarlaıdy Vesti.kz tilshisi.
Júk kólikteri sanatynda qashyqtyqty tórt saǵat on mınýt 24 sekýndta júrip ótken gollandııalyq «Ivekonyń» shabandozy Jerar de Roı jeńiske jetti. Ekinshi bolyp «KamAZ-Master» komandasynyń júrgizýshisi Andreı Kargınov keldi. Onyń komandalyq áriptesi Edýard Nıkolaev úshinshi orynnan kórindi.
Qazaqstandyq Artýr Ardavıchýs, Alekseı Nıkıjev jáne Radım Kaplanekanyń «Tatra» kóligi tórt saǵat 57 mınýt kórsetkishpen 12-orynnan tabyldy. Bul qazaqstandyq ekıpajdyń jalpy esepte eki satyǵa kóterilýine múmkindik berdi. Endi ol 14-shi orynda.
Sondaı-aq «Proto Overdrive» kóligimen saıysqa túsken Aıdyn Rahymbaev pen Vladımır Demıanenkonyń ekıpajy 21-shi bolyp jetti. Al T2 tobyndaǵy Denıs Berezovskıı men Ignat Falkov márege 41-shi bolyp keldi. Osy kezeńnen keıin Rahymbaevtyń toby jalpy esepte 18-shi, al Berezovskııdiń ekıpajy 37-shi orynnan tabyldy.
Búgin, 18 qańtarda «Dakar» rallı-marafonynyń sońǵy 12-shi kezeńi bastalady. Jarys La-Serenada bastalyp Valparaıso qalasynda aıaqtalady.
