Dakar rallıi: «Astana» aýyr júk kóligi 4-shi orynǵa kóterildi
ASTANA. QazAqparat - «Dakar -2018» rallı-marafonynyń on úshinshi kezeńi aıaqtaldy. Atalǵan kezeńde rallıshiler 929 shaqyrym joldy basyp ótip, on úshinshi kezeńniń baǵdary boıynsha qatysýshylardyń kerýeni Kordobý jerine - saıystyń aqtyq ýchastogyna taban tiredi, dep habarlaıdy «QazAqparat» HAA tilshisi.
Budan burynǵy arnaıy ýchastoktaǵy jarys qorytyndysy boıynsha, «Astana» aýyr júk kóliginiń ekıpajy 8-shi orynnan tabylyp, bas klassıfıkatsııada tórtinshi tuǵyrdan kóringen bolatyn. Artýr Ardavıchýs bul synda azdap sharshaǵanymen, óz kórsetkishine yrza ekenin aıtady.
«San Hýan - Kordoba» baǵdary boıynsha «Astana» grýzovıgi tehnıkalyq aqaýlyqtarǵa baılanysty birde-bir márte toqtaǵan joq. Ekıpajdyń tizginin ustaǵan júrgizýshi jyldamdyqty saqtaı otyryp, abaı bolý ádisimen júrip ótken. Alaıda jol boıynda kólikteri synyp qalǵan áriptesterine kómektesý úshin komanda birneshe márte aıaldady.
Qazaqstandyq kvadrtsıklshi Dmıtrıı Shılov on úshinshi kezeńde onynshy bolyp máre syzyǵyna jetti. Bas esepte ol 6-orynda tur. Osy deńgeıdegi jarystarda tuńǵysh ret baǵyn synap júrgen Shılov úshin bul jaman kórsetkish emes. Sportshynyń aqtyq saıys aldyndaǵy negizgi maqsaty - osy tuǵyryn saqtap qalý. Dmıtrııdiń ózi bolsa marafonnyń sońǵy kezeńderiniń biri aıaǵyna jetip qalǵanyna qaramastan, saıystyń áli jalǵasatynyn, oryndar belgilengen kestede ózgerister bolýy múmkin ekenin alǵa tartady.
Kúnniń aptap ystyǵyna jáne sýdyń joqtyǵyna qaramastan, «Astana» kvadratsıklshisi kezeńnen súrinbeı ótti. Marafonnyń kelesi kezeńi - fınaldyq jarys. Ol kezeńde sportshylar Kordoba qalasynyń ýchastogy boıynsha - 120, odan keıin 165 shaqyrym joldy basyp ótýleri kerek. Jeńimpazdar máre syzyǵyna jetkennen keıin marapattaý rásimi birden ótkiziledi.
Aıta keterligi, Kordoba - Argentına rallıiniń astanasy bolyp sanalady. Jergilikti jerdiń qyr-syryn jaqsy biletin qatysýshylardyń jeńiske degen múmkindikteri zor.
13-kezeńniń qorytyndysy:
Aýyr júk kóligi:
1. Edýard Nıkolaevtyń tizginindegi «Kamaz - Master» - 05:59.02
2. Aırat Mardeevtiń tizginindegi «Kamaz - Master» + 00:00.50
3. Martın Kolomanyń tizginindegi «Tatra Buggyra Racing» + 00:06.06
8. Artýr Ardavıchýstyń tizginindegi «Astana» + 01:00.12
Kvadrotsıkldar:
1. Heremıas Gonsales Ferıolı, «Consultores de Empresas» - 05:55.16
2. Nelson Aýgýsto Sanabrııa Galeano, «Sanabria Dakar Team» + 00:03.18
3. Ignasıo Kasale, «Casale Racing» + 00:04.03
10. Dmıtrıı Shılov, «Astana» + 00:19.31
Bas klassıfıkatsııa:
Aýyr júk kólikteri:
1. Edýard Nıkolaevtyń tizginindegi «Kamaz - Master» - 53:13.33
2. Sergeı Vıazovıchtiń tizginindegi «MAZ - avtosport» + 03:53.59
3. Aırat Mardeevtiń tizginindegi «Kamaz - Master» - 05:21.05
4. . Artýr Ardavıchýstyń tizginindegi «Astana» + 06:36.37
Kvadrotsıkldar:
1. Ignasıo Kasale, «Casale Racing» - 52.03.39
2. Nıkolas Kavılıasso, «Team al Desert» + 01:37.16
3. Heremıas Gonsales Ferıolı, «Consultores de Empresas» + 02:05.12
6. Dmıtrıı Shılov, «Astana» + 06:37.49
