Dakar-2026 jasóspirimder Olımpıadasyna bıletter satylymy bastaldy
ASTANA. KAZINFORM – Dakarda (Senegal) ótetin 2026 jylǵy jasóspirimder Olımpıadasynyń uıymdastyrý komıteti aldaǵy jarystarǵa bıletter satylymynyń bastalǵanyn jarııalady. Bul týraly QR Ulttyq Olımpıada komıteti habarlady.
Satylymnyń alǵashqy kezeńi 6 tamyzda bastalyp, 9 tamyzǵa deıin jalǵasady. Bul aralyqta bıletterdi tek Visa kartalarynyń ıeleri satyp ala alady. Al 10 tamyzdan bastap satylym barlyq qalaýshyǵa qoljetimdi bolady.
Bıletterdi «Dakar-2026» oıyndarynyń resmı bılet satý platformasy arqyly onlaın túrde satyp alýǵa bolady. Ol úshin paıdalanýshylar júıede tirkelip, ózderin qyzyqtyratyn sport túri men jarys sessııasyn tańdap, bılet sanyn kórsetip, tólem jasaýy qajet. Uıymdastyrýshylar jarystardy, saltanatty rásimderdi jáne jankúıerlerge arnalǵan is-sharalardy tamashalaýǵa múmkindik beretin birneshe sanattaǵy bıletterdi usynǵan. Bıletterdiń baǵasy 1000 KFA frankinen (shamamen 1,8 AQSh dollary) bastalady.
Sonymen qatar, quny 1500 KFA frankinen (shamamen 2,6 AQSh dollary) bastalatyn bir kúndik abonementter (Day Pass) satylymǵa shyǵarylady. Olar kórermenge bir kún ishinde birneshe jarysty tamashalaýǵa múmkindik beredi.
Ashylý saltanatyna arnalǵan bıletterdiń baǵasy A sanaty úshin 9000 KFA frankin (shamamen 15,8 AQSh dollary), al B sanaty úshin 5000 KFA frankin (shamamen 8,8 AQSh dollary) quraıdy. Jankúıerler aımaqtaryna kirý tegin bolady. Jalpy alǵanda, uıymdastyrýshylar shamamen bir mıllıon bılet satýdy josparlap otyr.
Dakardaǵy jasóspirimder Olımpıadasy 2026 jyldyń 31 qazany men 13 qarasha aralyǵynda ótedi. Jarystar Dakar, Dıamnıadıo jáne Salı qalalarynda uıymdastyrylady. Oıyndarǵa álemniń túkpir-túkpirinen shamamen 2700 jas sportshy qatysyp, sporttyń 25 túri boıynsha baq synaıdy.
Aıta keteıik, Dakar-2026 oıyndary jazǵy jasóspirimder Olımpıadasynyń tarıhyndaǵy tórtinshi doda bolmaq. Sonymen qatar, bul Afrıka qurlyǵynda alǵash ret uıymdastyrylatyn Olımpıada qozǵalysyna qatysty iri sporttyq shara.
Eske salsaq, Qazaqstan quramasy aldaǵy oıyndarda 11 sport túrinen óner kórsetý quqyǵyna ıe boldy. Qatysýshylar qataryna 18 qazaqstandyq sportshy endi. Alaıda joldamalar sportshylardyń atyna tirkelmegen, sondyqtan ulttyq quramanyń naqty quramy keıinirek anyqtalady.
Qaı jas sportshylar 2028 jylǵy Olımpıadada top jarýy múmkin ekenin jazǵan edik.
