«Dakar-2018» aıaqtaldy: «Astananyń» aýyr júk kóligi tórtinshi bolyp jetti

Marafonnyń aqtyq kezeńinde qatysýshylar sońǵy ári eń jyldam kezeńdi basyp ótýge mindettelgen bolatyn. Naqtyraq aıtqanda, 199 shaqyrymdyq arnaıy ýchastok pen Kordoba qalasynyń shetimen 165 shaqyrym joldy basyp ótý - myqtylardyń myqtysyn anyqtaýda negizgi syn edi. Sportshylardyń barlyǵy da osyǵan deıin 14 kezeńdi basyp ótip, sońǵysynda jeńimpazdy anyqtaý ǵana qalǵan.

«Dakardyń» aqtyq kezeńin «Astananyń» eki ekıpajy sátti júrip ótip, bestikke, al bas klassıfıkatsııada úzdik ondyqtyń qatarynan tabyldy. Artýr Ardavıchýstyń tizginindegi «Astananyń» aýyr júk kóligi óz kategorııasynda tórtinshi orynǵa taban tirese, saıysta tuńǵysh ret baǵyn synaǵan Dmıtrıı Shılov kvadratsıklshilerdiń jalpy esebinde altynshy orynǵa jaıǵasty.

Bul jolǵy «Dakar» buǵan deıingi saıystardan qaraǵanda eń uzaqqa sozylǵan jarysqa aınaldy. Kamaz Master kuramasynyń qataryndaǵy jeńimpaz Edýard Nıkolaevtyń aýyr júk kólikterdiń esebi 54 saǵat 57 mınýt 37 sekýndty quraıdy. Ótken jyly Nıkolaevtyń jalpy ýaqyt kórsetkishi 27 saǵat 58 mınýt 24 sekýnd bolǵan edi. Bul degenińiz arnaıy ýchastoktardyń ara qashyqtyǵy eki esege ulǵaıtylǵanyn, demek marafonnyń qyrqynshy saıysy eki birdeı «Dakardan» turǵanyn kórsetedi.

Aıta keterligi, bul jolǵy «Dakardyń» aýyr júk kólikteriniń jalpy esebinde márege 44 qatysýshynyń 19-y ǵana jetti. «Astana» ekıpajynyń mehanıgi Mıshel Hıýsman bıylǵy jyly tájirıbeli sportshylar ǵana jarysty aıaqtaı alǵanyn tilge tıek etedi.

«Dakarda» debıýtant retinde shyqqan 266 nómirli qazaqstandyq Dmıtrıı Shılov marafonnyń basty jańalyǵyna aınaldy dese de bolady - ol kvadratsıklshilerdiń jalpy esebinde altynshy orynǵa turaqtady. Mundaı joǵary kórsetkishke tájirıbesi az qatysýshylardyń kóbi qol jetkize bermeıtini anyq. Biraq, Shılov úmitti aqtap, úzdik ondyqtan kórinip otyr.

Eske sala ketsek, «Astana» komandasy «Dakarǵa» birinshi ret kvadratsıklshilerdi jarysqa jibergen bolatyn. Atap aıtqanda, Maksım Antımırov pen Dmıtrıı Shılov marafonda qatysýǵa shamalary keletinin dáleldegen bolatyn. Maksım Antımırov «Dakardyń» alǵashqy kezeńderin jaqsy bastaǵanyen, qulap, Perýdegi arnaıy ýchastokta jaraqat alǵannan keıin jarys jolynan shyǵyp qalǵan.

«Dakar -2018» Ońtústik Amerıkanyń úsh memleketiniń aýmaǵynda: Perý, Bolıvııa men Argentınada uıymdastyryldy.

14-shi kezeńniń qorytyndysy:

Aýyr júk kólikteri:

1. Ton Van Genýgtenniń tizginindegi «Petronas Team De Rooy Iveco» 01:39.47

2. Martına Meıchıktiń tizginindegi «Big Shock Racing» + 00:00.11

3. Dmıtrııa Sotnıkovtyń tizginindegi «Kamaz - Master» + 00:03.35

7. Artýr Ardavıchýstyń tizginindegi «Astana» + 00:06.02

Kvadrotsıklder:

1. Ignasıo Kasale, «Casale Racing» 01:43.25

2. Nıkolas Kavılıasso, «Team al Desert» + 00:01.36

3. Aleks Dıýtrı, «Drag'On Rally Team» + 00:01.43

11. Dmıtrıı Shılov, «Astana» +00:07.08

«Dakar - 2018» rallı-marafony bas klassıfıkatsııasynyń nátıjeleri:

 Aýyr júk kólikteri:

1. Edýard Nıkolaevtyń tizginindegi «Kamaz - Master» 54:57.37

2. Sergeı Vıazovıchtiń tizginindegi «MAZ - avtosport» + 03:57.17

3. Aırat Mardeevtiń tizginindegi «Kamaz - Master» + 05:22.34

4. Artýr Ardavıchýstyń tizginindegi «Astana» + 06:38.22

Kvadrotsıklder:

1. Ignasıo Kasale, «Casale Racing» 53:47.04

2. Nıkolas Kavılıasso, «Team al Desert» + 01:38.52

3. Heremıas Gonsales Ferıolı, «Consultores de Empresas» + 02:08.14

6. Dmıtrıı Shılov, «Astana» + 06:44.57