«Dakar-2016»: Qazaqstan komandasynyń birde-bir dóńgelegi jarylmaǵan jarys
ASTANA. QazAqparat - Búgin «Astana Motorsports» komandasynyń top basshysy Artýr Ardavıchýs jýrnalısterge arnalǵan baspasóz máslıhatynda dúnıejúzindegi eń qaýipti ári eń bedeldi avtokólik jarysy - «Dakar» oıynyndaǵy Qazaqstan komandasynyń nátıjesin baıandady.
Jýrnalısterdiń nazaryna «Astana Motorsports» komandasynyń Dakardaǵy medaldaryn, ózge de jarystardan jeńip alǵan marapattaryn usynǵan top basshysy «qazaqstandyqtarǵa osyndaı qýanysh syılaý úshin komanda keıde adam sengisiz batyl qadamdar jasaıdy» deıdi.
«Qazaqstannyń komandasy osymen jetinshi ret álemge áıgili Dakar jarysyna qatysyp otyr. Álemdegi eń qaýipti kólik jarysyna komandamyz jyl saıyn aman-esen qatysyp keledi. Bıyl da jetistikke jetken komanda Dakar reıtıngisinde Qazaqstannyń mártebesin bıikke kóterdi. Qazaqstannyń komandasy qatyspasa, búginde Dakar jarysynyń jankúıerleri oıyndy qabyldamaıdy deýge bolady. Aıta keteıin, Dakar jarystary ótetin orynda álem elderiniń týlary turady, mine, sol jerde Qazaqstannyń Týy alǵashqy on eldiń qatarynda», - deıdi top basshysy.
Biraq, A.Ardavıchýs Qazaqstannyń Týyn ustap, otandastaryn qýantyp keletin komanda osy kúnge jetkenshe nebir qıyndyqty bastan keshiretinin aıtady.
«Shirkin, Týymyzdy kóterip, jan-jaǵymyzdy qýantyp kele jatqan sátimiz keremet. Biraq, sizderge aqıqatyn aıtaıyn: sol jeńistiń artynda komandany kóz jasy, tipti, jany men qany jatyr. Dakar jarysynda janyńa batatyny - ózgeniń qaıǵysy. Óz tobyńdaǵy bir júrgizýshini aıtpaǵanda, basqa toptardaǵy tanys ekıpaj, tanys júrgizýshiler dene jaraqatyna baılanysty, bolmasa, kóliktiń aqaýyna baılanysty joldan shyǵyp ketip, qınalyp jatqanyn kórý - biz úshin óte aýyr synaq. Janymyzǵa batatyny da sol. Dakar jarysy men rallı-reıd jarystarynda barlyq komanda úlken bir otbasy deýge bolady. Kez kelgen ekıpaj kelesi bir ekıpajdyń janashyry bolyp otyr. Jigitterdiń arasynda muny - baýyrlar arasyndaǵy naǵyz dostyq deıdi. Tipti, keıde otyryp kólikterimizdiń tehnıkalyq jaǵdaıyn, bir-birimizdiń qatelikterimizdi aıtyp, «qarsylasymyzǵa» keńes berip otyramyz. Biraq, jarys jolynda ózgeniń qaıǵysyna kóńil aýdarýǵa bolmaıdy, aýdara almaısyń. ıAǵnı, biz jarys kezinde emotsııany umytyp úırengenbiz. Jarys jolynda óziń uıytqyp kele jatyp, órtenip jatqan, nemese tas-talqany shyqqan kólikti kóresiń. Aınalasyn qutqarýshylar men dárigerler qorshap, tóbesinde tikushaq ushyp júredi. Al, ishindegi ekıpaj óli me, tiri me, ony bile almaı óte shyǵamyz. Birneshe sekýndtan keıin jańaǵy jan túrshigerlik kórinisti múlde umytyp, tipti, kórmegendeı kúıge túsýiń kerek...», - deıdi jarystyń fızıkalyq qıyndyǵymen qatar, psıhologııalyq aýyr júgin aıtqan A. Ardavıchýs.
Al, top basshysy ár jarys aldynda óziniń kóligimen kádimgideı syrlasady eken.
«Árbir start aldynda men kóligimdi aınalyp, onyń jan-jaǵyn ustap kórip, kóligimmen kádimgideı sóılesemin. Kóligimniń árbir detalyn jarysqa daıyndap, ózim de temir tulparymnan bir jylýlyq, boıyma kúsh-qýat jınap alamyn. Kóligimniń árbir detaly úshin men de temirdiń bir bólshegine aınalyp ketemin. Jarys bitken soń, kóligime kádimgideı alǵys aıtamyn. Eń bastysy, bıylǵy Dakarda Qazaqstan komandasynyń bir de bir dóńgelegi jarylǵan joq», - dep qýantty toptyń kóshbasshysy.
