«Dakar-2015» rallı marafonynyń ekinshi kezeńinde Artýr Ardavıchýstyń júk kóligi aýdaryldy (FOTO)
ALMATY. QazAqparat - Argentınada ótip jatqan «Dakar - 2015» rallı marafonynyń ekinshi kezeńinde Astana Motorsports komandasynyń bir ekıpajy -Artýr Ardavıchýstyń júk kóligi aýdaryldy. Bul týraly búgin «Qazaqstan avtomobılderi» jýrnalynyń feısbýktegi paraqshasynda jarııa etildi.
«Ardavıchýstyń júk kóligi ekinshi kezeńniń 170-shi shaqyrymynda, Vılla Karlos Pas pen San Hýan qalalarynyń aralyǵynda aýdarylysqa ushyrady. Buralań taý jolynda aıaq astynan rýl qozǵalmaı qalǵan. Sodan, avtokólik joldan shyǵyp ketip, qııalaı qulady. Ekıpaj músheleri aman-saý. Osy sátte qastarynan ótip bara jatqan júk kóligi «Tatrany» turǵyzýǵa kómektesti. Árıne, ýaqyttan utyldyq. Qazirgi sátte 27 orynda kelemiz.
Keıinnen, tehnıkalyq komıssarlar ekıpajdyń damyl alǵan jerine kelip, «Tatrany» tekserip shyqty. Bul jerde basty talap - kóliktiń negizgi qańqasynyń bútindigi, terezeleriniń ońaı ashylyp, esikteriniń ońaı jabylýy. Tańǵy saǵat 06:00-de sońǵy tekserý bolady. Biraq, ekıpaj 90 paıyzǵa jarys jolyna shyǵýǵa daıyn. Al túngi saǵat 00:42 mınýtta márege 58 avtokólik kelip jetti. Al jarysqa barlyǵy 137 avtokólik shyqqan bolatyn. Denıs Berezovskııdiń ekıpajy áli márege jetken joq» , - dep jazady oqıǵa ornynan atalǵan jýrnaldyń jýrnalısi Roman Maslennıkov.
