Dakar-2015: Qıyndyqtarǵa qaramastan A. Rahymbaevtyń ekıpajy TOP-10 sapyndaǵy ornyn saqtap qaldy (FOTO)
ASTANA. QazAqparat - «Dakar-2015»-tiń 5-kezeńinen keıin qazaqstandyq motoshabandoz Aıdyn Rahymbaevtyń ekıpajy TOP-10-daǵy ornyn saqtap qala aldy. Bul týraly ol Feısbýktegi kúndeligine jazdy.
«Búgingi máre onsha qýanysh syılaı almady. Buǵan ózindik sebepteri boldy. Besinshi kezeńdegi arnaıy ýchaske óte jyldam ótýge tıis ári tym uzaqqa - 458 shaqyrymǵa sozyldy. Oǵan qosa 240 shaqyrym lıazon boldy. Jarys Atakama shólinen bastaldy. Biz jarysqa 13-shi bolyp shyqtyq. Barlyq joldy ótip bitkenshe aptap ystyq bir sátke de basylǵan joq. Jol tastaq ári kóptegen shuńqyrlar men jyralarǵa toly boldy», - dep jazdy A. Rahymbaev óz kúndeliginde.
Onyń jazýynsha, joldyń 320-synshy shaqyrymynda dońǵalaq bir shuńqyrǵa dóp kelip, kólik aýdarylyp kete jazdaǵan. Ekıpaj músheleri qatty soqqydan azdap jaraqattanyp, keı jerlerin kógertip alypty.
Jarys kóligi tastaqty jazyqqa jetkende, motoshabandozdar dóńgelekti jaryp almas úshin jyldamdyqty azaıtýǵa májbúr bolǵan. «Degenmen márege 15 shaqyrymdaı qalǵanda bir dóńgelegimiz jarylyp, ony aýystyrýǵa biraz ýaqytymyzdy ketirdik», - deıdi A.Rahymbaev.
Odan keıin birneshe shaqyrym júrgen soń, komanda taǵy bir jarylǵan dóńgelekti aýystyrýǵa toqtaǵan. «Barlyq sátsizdikterge qosa, márege 10 shaqyrym qalǵanda kóliktiń tejegishi de isten shyqty. Sondyqtan jyldamdyqty tipti azaıtýǵa týra keldi. Sóıtip, márege jybyrlap otyryp ázer jettik. Mine, besinshi kezeń osylaı kóńilsiz aıaqtaldy. Keıinirek kezeń qorytyndysy boıynsha 15-shi orynda kelgenimizdi bildik. Biraq overoll'e boıynsha bes kúnniń qorytyndysynda biz úzdik 10-dyqtaǵy ornymyzdy saqtap qaldyq. Keshegi toǵyzynshy ornymyzdy jol talǵamaıtyn kólikter jarysyndaǵy Dakardyń 5 dúrkin chempıony Stefan Petranselge bergen ekenbiz», - dep jazady A. Rahymbaev.
