«Dakar-2015»-ke Qazaqstannan 4 ekıpaj qatysady
ASTANA. QazAqparat - «Dakar-2015» 4 qańtarda Býenos-Aıres qalasynan bastalyp, qorytyndy kezeńi 17 qańtarda osy qalada aıaqtalady. Bul týraly búgin ótken baspasóz máslıhatynda «Astana» Prezıdenttik kásibı sport klýbynyń tóraǵasy Vladımır Smırnov aıtty.
Onyń málimetinshe, jarys Argentına, Chılı jáne Bolıvııa jerlerin basyp ótedi.
Jol talǵamaıtyn kólikter kategorııasy boıynsha T1 sanatyndaǵy eki ekıpaj qatysady. Olar MINI avtokóligindegi júrgizýshi Aıdyn Rahymbaev pen shtýrman Anton Nıkolaev. al Toyota Overdrive kóligimen júrgizýshi Baýyrjan Isabaev pen shtýrman Vladımır Demıanenko.
T2 sanatynda (jeńil kólikter) Denıs Berezovskıı men Ignat Falkov qatysady. Júk kóligi (T4) sanatynda «Dakar-2012»-niń qola júldegeri júrgizýshi Artýr Ardavıchýs, shtýrman Alekseı Nıkıjev jáne mehanık Danıel Kozlovskıı baq synaıdy. Olardyń kóligi - 515 nómirli Tatra.
Aıta keteıik, 2015 jylǵy «Dakarǵa» álemniń 50 elinen 450 ekıpaj qatysady. Olar 9 myń shaqyrymdy júrip ótýleri kerek. Bul joldyń 5 myńǵa jýyq shaqyrymy asa jyldam júrýge arnalǵan arnaıy aımaqtar bolmaq.
