Dakar-2015: Aıdyn Rahymbaevtyń kóligi janyp kete jazdady (FOTO)
ASTANA. QazAqparat - «Astana» komandasynyń ekıpajy Aıdyn Rahymbaev Dakar-2015-tegi altynshy kúnnen keıin TOP-10 ustanymynan shyǵyp qaldy. Bul týraly ol Feısbýktegi jeke paraqshasynda jazdy.
«Tańerteńnen bastap qyrsyq shaldy. 400 shaqyrymdaı lıazonnan ótken kezde, qozǵaltqysh qorabynan maı aǵyp ketkenin baıqadyq», - dep jazdy A. Rahymbaev.
Ekinshi arnaıy ýchaskeniń basynda qoraptan aqqan maı tuǵyryqqa tolyp ketti. «Bir kezde kúıgen ıisti sezdik, kólik janyp ketetindeı kórindi, dereý toqtap, kólikten shyǵyp, qolymyzǵa órt sóndirgishti ala shyqtyq. Abyroı bolǵanda, ot tutanbapty», - dep jazǵan sportshy.
«Qoraptan maı ábden aqqan. Jóndeımiz dep, bir saǵat joǵalttyq. Degenmen, márege jetip úlgerdik. Kólik jóndeledi ǵoı. Sóıtip, jalpy esepte 13-shi orynǵa jaıǵastyq. Bul kórsetkish bizge kedergi bolmas, sebebi úlken jarys áli alda. Birinshi ondyqqa qaıta oralýǵa bar kúshimizdi salamyz», - dep túıindedi ol.
