Dakar 2015: Aıdyn Rahymbaevtyń ekıpajy úzdik ondyqta keledi (FOTO)
ASTANA. QazAqparat - Dakardyń tórtinshi jarys kúninde Aıdyn Rahymbaevtyń ekıpajy jalpy esepte toǵyzynshy oryndy ıelenip otyr. Bul týraly ol óziniń Feısbýktegi paraqshasynda habarlady.
«Bul eń uzaq ári oqıǵaǵa toly kún boldy. Tańǵy 5:30-da turyp, 6:30 saǵatta kún shyǵyspen jarysty bastap ketti. Kerýen baǵzy And taýynyń qar basqan buralań taý joldarymen kóterilip kele jatqanda kózdiń jaýyn alatyn ádemi kórinis boldy. Tym úırenshikti emes kórinis. Kerýen jarysty jalǵastyrý úshin Argentınadan Chılıge bet aldy. And - jáı ǵana taý emes. Bul alyp taýly jon jáne biz ony búgin tiginen kesip óttik», - dep jazady A.Rahymbaev.
Onyń sózine qaraǵanda, 3200 metr bıiktikte ekıpaj birinen soń biri jarys jolyna shyqty. Alǵashqy 100 shaqyrym taýly ıirim joldar bolǵan. Sońǵy 120 shaqyrymdyq jol Atakama shóli arqyly ótken. Bul álemniń eń qurǵaq shóli.
«Biz jarysty 13-orynda aıaqtadyq! Eger qatelikter men dóńgelek aýystyrýǵa ketken ýaqytty sanamaǵanda bul óte jaqsy kórsetkish. Bıvýakqa jetkenimizde bizdi overall-da jáı jańalyq emes, sýperjańalyq kútip turdy. Tórt kúngi nátıjemiz boıynsha 9-orynǵa kóterilippiz! Biz ondyqtamyz!», - dep atap ótti ol.
A.Rahymbaevtyń habarlaýynsha, «Astana» komandasynan Denıs Berezovskıı jarystan shyǵyp qalǵan. «Onyń kóligi ekinshi kúni shydas bermedi», - dedi A.Rahymbaev.
Osylaısha, «Dakar-2015» jarysynda Qazaqstan namysyn Astana Motorsports komandasynyń eki jeńil kóligi jáne bir júk kólik qorǵaýda. Jol talǵamaıtyn kólikter sanatynyń T1 klasynda MINI kóliginde - júrgizýshi Aıdyn Rahymbaev pen shtýrman Anton Nıkolaev, sondaı-aq Toyota Overdrive kóliginde Baýyrjan Isabaev pen shtýrman Vladımır Demıanenko bar. Júk kólikteri (T4) sanatynda «Dakar-2012» básekesiniń qola júldegerleri Artýr Ardavıchýs, shtýrman Alekseı Nıkıjev pen mehanık Danıel Kozlovskıı - jarys jolynda.
