Daq bezgegi: SQO turǵyny sırek kezdesetin bezgekti juqtyryp aýrýhanaǵa tústi
PETROPAVL. KAZINFORM – Daq bezgegin óńir turǵyny keneden juqtyrǵan.
Petropavldaǵy birinshi qalalyq aýrýhananyń málimetinshe, juqpaly aýrýlar bólimshesine joǵary dene qyzýyna, qatty bas aýrýyna jáne álsizdikke shaǵymdanǵan áıel tústi.
Aıtýynsha, birneshe kún buryn ústinen kene tapqan.
- Shaǵyp turǵan keneni emhanaǵa baryp alǵyzdym. Mamandar shaqqan jerin óńdedi. Aýrý belgileri bolmaǵannan keıin úıge kettim. Birer kúnnen keıin jaǵdaıym nasharlap, temperatýram kóterildi, denem qaltyrap, ózimdi qoıarǵa jer tappadym, - deıdi syrqat.
Turǵylyqty jeri boıynsha emhanaǵa júgingen ony dárigerler birden juqpaly aýrýlar bólimshesine jatqyzdy. Naýqasqa Rickettsia Siberica týyndaǵan daq bezgegi degen dıagnoz qoıyldy.
Júrgizilgen em-dom nátıjesinde áıeldiń beti beri qarady.
- Kene arqyly juǵatyn ınfektsııalar kóp jaǵdaıda bastapqy kezeńde bilinbeıdi. Ádette adamda dene qyzýynyń azdap kóterilýi, álsizdik, bas aýrýy sııaqty belgiler ǵana baıqalady. Osyǵan baılanysty adamdar medıtsınalyq kómekke kesh júginedi. Kene shaqqannan keıin ýaqyt ozdyrmaı dárigerge qaralý mańyzdy. Erte tekserýden ótken jaǵdaıda naýqasqa em der kezinde qoldanylady. Bul aýrýdyń jeńil ótýine jáne asqyný qaýpiniń tómendeýine múmkindik beredi, - deıdi dárigerler.
Al medıtsınalyq kómekke kesh júginý ınfektsııanyń aǵzaǵa keńinen taralýyna, ýlaný belgileriniń kúsheıýine, dene qyzýynyń joǵarylaýyna ákelýi múmkin. Sondaı-aq aýrý qan tamyrlary men ishki aǵzalardy, sonyń ishinde baýyrdy, júrekti, ókpeni zaqymdap, keı jaǵdaıda júıke júıesine de áser etýi yqtımal. Mundaı jaǵdaıda emdeý uzaqqa sozylady.
Soltústik Qazaqstan oblysy sanıtarııalyq-epıdemıologııalyq baqylaý departamentiniń málimetinshe, kún jylynǵaly kenelerdiń belsendilik kezeńi bastaldy. Búgingi tańda kene shaqqannan keıin 711 adam medıtsınalyq kómekke júgingen. Olardyń 188-i - 14 jasqa deıingi balalar.
Buǵan deıin kene shaqqan jaǵdaıda ne isteý kerektigi jóninde dárigerlerdiń keńesin bergen edik.
