DAISh-ty nasıhattaǵan aqtóbelikterdiń aty-jóni belgili boldy
AQTÓBE. QazAqparat - DAISh (Qazaqstan jáne ózge de birqatar elder aýmaǵynda tyıym salynǵan) terrorıstik uıymyn nasıhattaǵan aqtóbelik 4 azamattyń aty-jóni belgili boldy, dep habarlaıdy QazAqparat tilshisi.
Aqtóbe oblysynyń 4 turǵyny terrorızmdi nasıhattady degen kúdikpen ustalǵanyn buǵan deıin habarlaǵan bolatynbyz.
Tintý kezinde olardan ańshy myltyǵy, oq-dáriler, gazdy jáne travmatıkalyq tapanshalar, destrýktıvti dinı mazmundaǵy kitaptar tabyldy.
Búgin sot Ulttyq qaýipsizdik komıteti Aqtóbe oblystyq departamentiniń E.Sarqulovty, A.Myrzakárimovti, A.Dáýletııarov pen A. Saýanaevty kúzetpen ustaý túrindegi bultartpaý sharasyn sanktsııalady.
«Sotqa deıingi tergep-tekserý organymen E.Sarqulov, A.Myrzakárimov, A.Dáýletııarov, A. Saýanaev Qylmystyq kodekstiń «Terrorızmdi nasıhattaý nemese terrorızm aktisin jasaýǵa jarııa túrde shaqyrý» babynyń «Adam óziniń qyzmet babyn paıdalana otyryp ne qoǵamdyq birlestik lıderi jasaǵan, ne buqaralyq aqparat quraldary nemese telekommýnıkatsııalar jelileri paıdalanyla otyryp jasalǵan ne adamdar toby nemese aldyn ala sóz baılasý arqyly adamdar toby jasaǵan, onyń ishinde sheteldik kózderden alynǵan qarajat paıdalanyla otyryp jasalǵan dál sol is-áreketter» tarmaǵy boıynsha kúdikke ilikti. Ulttyq qaýipsizdik komıtetiniń Aqtóbe oblysy boıynsha departamenti tórt kúdiktini 2 aı qamaýda ustaý týraly ótinishhat jiberdi. Sot kúzetpen ustaý túrindegi bultartpaý sharasyn sanktsııalady», - dedi Aqtóbe oblystyq sotynyń baspasóz hatshysy Anar Aıtjanova.
