DAISh-ti dinmen baılanystyrmaý kerek - Erlan Qarın
ASTANA. QazAqparat DAISh belgili bir aýmaqta bekingenin, olardyń qatarlary artyp kele jatqanyn nasıhattaǵysy keledi. Bul týraly búgin Astanadaǵy QR Prezıdenti janyndaǵy Strategııalyq zertteýler ınstıtýtynyń dırektory Erlan Qarın málim etti.
«Kóbinese sarapshylar, BAQ ókilderi, memlekettik bılik organdarynyń ókilderi lańkestik máselesine qatysty pikir bildirgen kezde eń kóp atalyp júrgen uıymdardyń biri DAISh-ti aqparattyq keńistikte «Islam memleketi» dep jıi ataı salady. Bul óte qate tujyrym. Osy top ózin bulaı atady eken dep biz olardy solaı ataýǵa mindetti emespiz. Qylmyskerler osy ataýdy qoldaný arqyly belgili bir strategııalyq maqsattardy kózdeıdi. ıAǵnı, belgili bir aýmaqta bekingenin, olardyń qatarlary artyp kele jatqanyn kórsetkisi keledi. Sóıtip, keıinnen olardy moıyndaýǵa tıisti alǵysharttar daıyndap jatqandaı bolady», - dedi E. Qarın Ortalyq jáne Ońtústik Azııa elderindegi zorlyq-zombylyq ekstremızmge qarsy is-qımyl jónindegi óńirlik konferentsııa barysynda tilshilerge bergen suhbatynda.
Bul turǵyda ol bul topty qalaı bolsa da «Islam memleketi» dep ataýdan saqtanýymyz kerek ekenin qadap aıtty.
«Eń bastysy «Islam memleketi» degen ataý keńinen qoldanylǵannan, osy toptyń tarapynan jasalatyn is-qımyldardyń barlyǵy dinı sıpatqa ıe bolady. ıAǵnı, barlyǵy ony Islam dinimen baılanystyratyn bolady. Sondyqtan ony dinmen múldem baılanystyrmaý qajet», - dedi ınstıtýt dırektory.
Osy oraıda E. Qarın DAISh ókilderiniń óz maqsattaryna jumys istep jatqan qylmyskerler ekenin atap ótti.
