DAISh pen «Boko Haram» barsha álemge soǵys jarııalap otyr - QR UQK tóraǵasy
ASTANA. QazAqparat - Internet jelisinen ekstremıstik kontentti joıýdyń biryńǵaı tártibin halyqaralyq deńgeıde aıqyndaýdyń qajettiligi burynnan suranyp otyr. Bul týraly búgin Astanadaǵy Ortalyq jáne Ońtústik Azııa elderindegi zorlyq-zombylyq ekstremızmge qarsy is-qımyl jónindegi óńirlik konferentsııada QR Ulttyq qaýipsizdik komıteti tóraǵasy Nurtaı Ábiqaev málim etti.
«Biz Internet arqyly, elge ekstremıstik kitaptar men túrli mıssıonerlerdiń zańsyz kelýi arqyly ekstremızm jáne lańkestik ıdelogııasyn nasıhattaýdyń, oǵan jappaı tartýdyń faktilerine kýáger bolýdamyz. Internet jelisinen ekstremıstik kontentti joıýdyń biryńǵaı tártibin halyqaralyq deńgeıde aıqyndaýdyń qajettiligi burynnan suranyp otyr», - dedi QR UQK basshysy.
Onyń aıtýynsha, búginde álemdegi lańkestik uıymdardyń biryńǵaı tizimin jasap, osyndaı uıymdarǵa kómekteskeni úshin saıası jáne ekonomıkalyq sanktsııalardy ornatý kerek.
«Búginde DAISh pen «Boko Haram» óziniń aýqymy boıynsha ál-Kaıdadan asyp túskenin baıqap otyrmyz. Qazirgi kezde olar jańa deńgeıge shyǵyp, túrli elderde olardyń belsendileriniń zańsyz jáne zańdy bolýynyń múmkindikteri keńinen paıdalanylýda», - dedi N.Ábiqaev.
Osy oraıda ol atalǵan lańkesterdiń tarapynan qazirgi zamanǵy aqparattyq-psıhologııalyq yqpal etýdiń ádisteri paıdalanylyp otyrǵandyǵyn atap ótti.
«Shyn máninde olar bólek memleketterge ǵana emes, sonymen qatar barsha álemdik qoǵamdastyqqa soǵys jarııalap otyr», - dedi UQK tóraǵasy.
