Daǵystandyq eki brakonerge úkim shyqty
ASTANA. 11 sáýir. QazAqparat /Qanat Mámetqazyuly/ - Atyraý qalasynyń №2-shi soty Daǵystan azamaty bolyp tabylatyn aǵaıyndy Gazıevterge úkim shyǵardy.
Bul týraly QazAqparat Bas prokýratýranyń baspasóz qyzmetine silteme jasap habarlaıdy.
«8 sáýirde Atyraý qalasynyń №2-shi soty eki daǵystandyq brakonerge, Magomed pen Murat Gazıevke úkim shyǵardy. Atalǵan tulǵalar ózderiniń janyndaǵy 9 sybaılasymen birge ótken jyldyń qarasha aıynyń sońyna taman zańsyz balyq aýlaý barysynda tutqyndalǵan bolatyn. Tutqyndaý barysynda brakonerler tarapynan qarýly qarsylyq kórsetýler de oryn aldy. Sonyń saldarynan týyndaǵan atys barysynda eki brakoner qaza tapqan bolatyn», - delingen baspasóz habarlamasynda.
Qylmystyq kodekstiń 287-baby 3-tarmaǵynda qarastyrylǵan: «iri kólemde bekire tuqymdas balyqtardy zańsyz aýlaý» qylmysyn jasaǵany úshin brakonerlerdi 2 jylǵa bas bostandyǵynan aıyrý týraly úkim shyǵaryldy. Olardyń múlikteri de tárkilenetin bolady.
