Daǵystandaǵy bir meshitte atys bolyp, artynan jarylys oryn aldy
ASTANA. 19 tamyz. QazAqparat - Senbi kúni keshke atys bolǵan daǵystandyq Hasavıýrt qalasyndaǵy sheıitterdiń meshitinde búgin jarylǵysh zat iske qosyldy.
Bul týraly respýblıkalyq ІІM habarlaǵan. Aldyn ala málimetter boıynsha, zardap shekkender bar, dep habarlaıdy RBK.
Quqyq qorǵaýshylar bergen málimet boıynsha, meshitke eki jarylǵysh zat qoıylǵan. Olardyń bireýi jaryldy, ekinshisin saperler zalalsyzdandyrdy.
Sondaı-aq, keshe keshkisin meshitke basa-kókteı kirip, namazhandarǵa oq jaýdyrǵan eki lańkestiń kesirinen 8 adam zardap shekti. Bunyń aldynda 6 adam jaralandy degen aqparat taraǵan bolatyn. Olardyń barlyǵy Hasavıýrttiń Ortalyq aýrýhanasyna jetkizildi. Zardap shekkenderdiń ekeýiniń jaǵdaıy aýyr, al qalǵandary aıaq-qoldarynan jaraqat alǵan.
Shabýyl senbi kúni jergilikti ýaqytpen keshki 20:55 kezinde bolǵan. «Magıdov kóshesinde ornalasqan sheıitterdiń meshitine betperde kıgen belgisiz eki adam kelip, namaz oqyp jatqan adamdarǵa qaraı oq jaýdyrǵan», - dep málimdedi respýblıkalyq ІІM.
Atystan keıin qylmyskerler meshit ishine jarylǵysh zattardy jasyryp, qashyp ketken. Olardy izin sýytpaı ustaý múmkin bolmady. Qazirgi kezde lańkesterdi izdeýge barlyq kúsh jumyldyrylǵan.
Hasavıýrttaǵy qandy oqıǵa qasıetti Ramazan aıy bitisimen keletin musylmandardyń eń ulyq meıramy - Oraza aıt qarsańynda bolyp otyr.
