Daǵystanda oqqa ushqan azamattyń qazaqstandyq tólqujaty óz kúshin 2012 jyldyń mamyrynda joǵaltqan - QR SІM
ASTANA. 13 qarasha. QazAqparat - Daǵystanda oqqa ushqan Vadım Kadymovtyń qazaqstandyq tólqujaty óz kúshin 2012 jyldyń 17 mamyrynda joǵaltqan.
Bul búgin ótken brıfıngte QR Syrtqy ister mınıstrliginiń resmı ókili Altaı Ábıbýllaev málim etti.
«Daǵystanda oqqa ushqan adamnyń azamattyǵyn anyqtaý maqsatynda Reseı tarapyna der kezinde tıisti suranys joldandy. 12 qarasha kúni RF Ulttyq lańkestikke qarsy komıtetinen tıisti aqparat aldyq. Reseı Federaldy Qaýipsizdik qyzmeti Shekara qyzmetiniń málimetterine sáıkes, Aqtaý týmasy (1985 jyly týǵan) Vadım Kadysovıch Kadymov jeke saparmen 2010 jyldyń 24 shildesinde Qazaqstan Respýblıkasynyń ulttyq tólqujatymen RF shekarasynan ótkeni anyqtaldy. QR tólqujaty óz kúshin 2012 jyldyń 17 mamyrynda joǵaltqan»,-dedi resmı ókil.
Belgili bolǵandaı, Daǵystan Respýblıkasy Tergeý basqarmasynyń aldyn ala aqparaty boıynsha, qazirgi tańda onyń azamattyǵyn anyqtaý boıynsha tergeý amaldary júrgizilýde.
«Atalǵan tulǵa Qazaqstan Respýblıkasynyń azamaty dep tanylǵan jaǵdaıda Tergeý basqarmasy resmı túrde habarlaıtyn bolady»,-dedi A. Ábıbýllaev.
Esterińzge sala keteıik, jaqynda buqaralyq aqparat quraldary Daǵystanda Qazaqstan azamatynyń oqqa ushqanyn habarlaǵan bolatyn. Reseıdiń lańkestikke qarsy kúres komıtetiniń mamandary úsh adamnan quralǵan topty sodyr dep tanyp, olardy qolǵa túsirý operatsııasyn iske asyrdy. Bastapqyda polıtseıler sodyrlardyń erikti túrde berilýlerin ótingen. Biraq, olar munan bas tartyp, jaýap retinde oq jaýdyrdy.
