Daǵystanda bir aýylda 30 úı men ǵımarat janyp ketti
ASTANA. QazAqparat - Daǵystandaǵy bir aýylda 30-ǵa jýyq úı men qora órtenip ketti, eshkim zardap shekken joq. Bul týraly RF quramyndaǵy respýblıkanyń basshysy Vladımır Vasılev málim etti, dep habarlaıdy TASS.
«Máskeý ýaqytymen 00:45-tegi jaǵdaı boıynsha 17 turǵyn úı, 14 qora janyp ketti. Eshkim zardap shekken joq. Maldy da qoradan shyǵaryp úlgerdik», - dedi Vasılev.
Qazirgi tańda órtti sóndirýge 1,5 myń adam jumyldyrylǵan. Aımaq basshysynyń aıtýynsha, sý jetkizý jaǵynan qıyndyqtar bar, sonymen qatar órtti aýyzdyqtaýǵa jel men aýyldyń ornalasqan jeri de kedergi keltirip otyr. Biraq jaǵdaı baqylaýǵa alynǵan.
