Daǵystan prezıdentin parlament saılaıtyn boldy
ASTANA. 19 sáýir. QazAqparat - Daǵystan parlamenti respýblıka prezıdentin halyq emes, parlamenttiń saılaýyn qoldady.
Beısenbide 74 depýtat prezıdentti saılaý quqyn parlamentke berýdi qoldap daýys berdi. 9 depýtat oǵan qarsy bolyp, úsh depýtat qalys qaldy, dep habarlaıdy «Azattyq».
Daǵystannyń qazirgi prezıdenti Ramazan Abdýlatıpovty qańtarda Reseı prezıdenti Vladımır Pýtın taǵaıyndaǵan edi.
Pýtın osy aıdyń basynda Reseı quramyndaǵy respýblıkalardyń parlamentterine óz prezıdentterin saılaýyna ruqsat etetin zańǵa qol qoıǵan.
Soltústik Kavkaz aımaǵyndaǵy taǵy bir respýblıka - Ingýshetııada da parlament 20 sáýirde prezıdentti ıa halyq, ıa parlament arqyly saılaý máselesin daýysqa salmaq. Parlament otyrysta saılaýǵa qatysty basqa da máselelerdi talqylaıdy.
