Daǵystandaǵy sý tasqyny saldarynan 4 myńnan astam adam evakýatsııalandy

ASTANA. KAZINFORM – 5 sáýir kúni Daǵystan aýmaǵynda jaýǵan nóser turǵyn úıler men elektr qosalqy stantsııalaryn qaıtadan sý basýyna, sondaı-aq kólik qatynasynyń shektelýine sebep boldy. Daǵystan bıligi 10-nan astam mýnıtsıpalıtte tótenshe jaǵdaı rejımin engizdi, dep habarlaıdy TASS.

Sýdyń shamadan tys tolýyna baılanysty Gedjýh sý qoımasy dambasynda jergilikti jarylystar tirkeldi.

RF TJM málimetinshe, sý qoımasynyń tolyp ketýine baılanysty 4 100-den astam adam evakýatsııalandy. Sý 28 turǵyn úıdi basyp qaldy. Taǵy 4 eldi mekendi sý shaıyp ketýi múmkin. Onda 3 myńnan astam baspanada 20 myńnan astam adam turady.

Daǵystan Kólik mınıstrliginiń baspasóz qyzmeti habarlaǵandaı, Máskeý — Derbent baǵytyndaǵy poıyzdyń 37 jolaýshysy Daǵystanskıe Ognı — Mamedkala temirjol ýchaskesiniń sý basýyna baılanysty evakýatsııalandy.

Respýblıkalyq jol polıtsııasynyń málimetinshe, Daǵystannyń Derbent aýdanynda sý deńgeıiniń kóterilýinen kópirdiń qulaýyna baılanysty «Kavkaz» federaldyq avtojoly jabyldy.

Kırkı aýylynda nóser jaýyn saldarynan kóshkin boldy. Bir úı tolyq qırap, taǵy ekeýi jartylaı zaqymdandy. Qıraǵan úıdiń úıindilerin tazalaý kezinde áıel adamnyń máıiti tabyldy.

Mahachkala qalasynda Gazoprovodnaıa kóshesinde sý basý saldarynan kópqabatty turǵyn úı qulady. Qalalyq ákimdik taǵy tórt kópqabatty úıdiń qulaý qaýpi bar ekenin málimdedi. Ǵımarattardan shamamen 300 adam evakýatsııalanyp, aýmaq qorshaýǵa alyndy.

Aıta keteıik, Aýǵanstandaǵy sý tasqynynan 77 adam kóz jumdy.