Daǵystanda nıkab kııýge ýaqytsha tyıym salyndy

ASTANA. KAZINFORM — Anyqtalǵan qaýip-qater joıylyp, jańa teologııalyq tujyrym jasalǵansha Daǵystan múftııaty nıkab kııýge ýaqytsha tyıym saldy. Bul týraly respýblıka múftıiniń orynbasary Abdýlla Salımov málimdedi, dep jazady TASS. 

«Daǵystan múftıi respýblıkanyń ulttyq saıasat jáne din isteri mınıstrliginiń úndeýine silteme jasaı otyryp, respýblıka halqynyń qaýipsizdigine qaýip tónip turǵanyn habarlaıdy. Sondyqtan pátýa bóliminiń quzyretti qorytyndysyna súıene otyryp, anyqtalǵan qaýip-qater joıylmaıynsha jáne jańa teologııalyq qorytyndyǵa deıin nıkab kııýge ýaqytsha tyıym salynady», - dedi Salımov Daǵystan múftııatynyń Telegram kanalynda jarııalanǵan vıdeo habarlamasynda.

Buǵan deıin aımaq múftııatynyń pátýa bólimi jergilikti jerlerde nıkab kııýge tyıym salý qandaı jaǵdaıda qarastyrylatynyn bólek túsindirýdi josparlap otyrǵanyn habarlaǵan.

2 shilde kúni múftııat Telegram arnasynda pátýa bólimi tórt mazhabtaǵy sharıǵat mátinderin taldap, nıkabqa jalpyǵa birdeı tyıym salý týraly sheshim qabyldaýǵa jetkilikti negiz tappaǵanyn habarlaǵan. 

Belgili bir jaǵdaılarda qaýipsizdik maqsatynda nıkab kııýge jergilikti ýaqytsha tyıym salý engizilýi múmkin ekeni túsindirildi.

Buǵan deıin Daǵystan basshysy Sergeı Melıkov nıkab kııýge qarsy shyǵyp, bul kıimniń Kavkaz halyqtaryna tán emes ekenin aıtqan bolatyn.

Ol óz kózqarasyn, sonyń ishinde qaýipsizdik sebepterin túsindirdi, óıtkeni mundaı kıim «erkekterge osy kıimniń artyna jasyrynýǵa, al áıelderge keń kıimniń astynda tyıym salynǵan zattardy alyp júrýge múmkindik beredi».