Daǵdarysty eńserý úshin qazaqstandyqtarǵa kóp ári sapaly jumys isteý kerek - M.Mıronenko
ASTANA. QazAqparat - Daǵdarysty eńserý úshin qazaqstandyqtarǵa kóp ári sapaly jumys isteý kerek. Bul týraly búgin Ortalyq kommýnıkatsııalar qyzmetinde ótken baspasóz máslıhatynda «Qazaqstan Respýblıkasynyń Tuńǵysh Prezıdenti - Elbasy kitaphanasy» strategııalyq zertteýler jáne josparlaý qyzmetiniń basshysy Mıhaıl Mıronenko málim etti.
«Álemdik daǵdarys qalaı damıtyny týraly naqty stsenarıı joq. Múmkin, BAQ habarlaǵandaı, álemdik ekonomıkanyń qatty quldyraýy bola qoımas. Menińshe, azdap tómendeý bolady, sodan soń turaqtylyq ornaıdy», - deıdi ol.
Sarapshynyń sózine qaraǵanda, bul daǵdarys álemniń ár túkpirindegi elder úshin ártúrli sezilýi yqtımal.
«Keıbir elder turaqty ósim kórsetedi jáne olardyń damýy bir deńgeıde qalady. Basqalaryna ekonomıkanyń quldyraý belsendirek júrmek. Bıylǵy jyldyń erekshe tustarynyń biri, daǵdaryspen qatar geosaıası máseleler ýshyǵyp ketti. Bul óz kezeginde daǵdarystyń odan ári kúsheıýine ákep soqtyrýda», - dep atap ótti M.Mıronenko.
Onyń oıynsha, álemdegi geosaıası úderisterdiń shıeleniskeni sonshalyqty, endi ol burynǵydaı sıpatqa ıe bola almaıdy.
«Álemde geosaıası jáne ekonomıkalyq turaqsyzdyqtyń áserinen jaǵymsyz syrtqy ahýal qalyptasyp otyr. Soǵan oraı, keıbir elderdiń áleýmettik-ekonomıkalyq damý jáne halyqtyń ál-aýqatyn saqtap qalý úshin ishki resýrstary men qorlaryn qymtaýy zańdy jaǵdaı. Al ol úshin bizge kóbirek jáne sapalyraq jumys isteý kerek», - dep túıdi sózin M.Mıronenko.
