Daǵdarysta bolǵan qaraǵandylyq kómir óndiretin kompanııanyń ekonomıkalyq jaǵdaıy qalpyna kelýde
ASTANA. QazAqparat - Kóp jylǵy daǵdarysty bastan keshken qaraǵandylyq «Gefest» kompanııasy úshin ekonomıkalyq jaǵdaı birtindep qalpyna kelýde. Bul týraly «Gefest» TK dırektory Artýr Beısegerımov Qaraǵandy oblystyq ákimdiginde ótken kómir ónerkásibin damytý jónindegi keńeste málim etti.
Kásiporyn aldaǵy ýaqytta kómir óndirýdi ulǵaıtý jáne jumyskerlerdiń eńbekaqysyn kóterý kózdep otyr. «Ótken jyldyń ortasynan bastap reseılik metallýrgııalyq kombınattarǵa jóneltilimder qaıta jandandyryldy. Búginde bir baıytý fabrıkasy jumys istep tur, ekinshisi konservatsııa rejıminde. Qazirgi OBF ótken jyly tamyz aıynda iske qosyldy, onyń qýattylyǵy tómen. 100 myń tonna kómir óńdeldi, Reseıge, Qytaıǵa kontsentrattyń shaǵyn kólemi jóneltildi. 2017 jyldyń birinshi toqsanyna kelisimshart jasaldy», - dedi kompanııa basshysy.
Onyń aıtýynsha, baıytý fabrıkasyna túsetin júkteme 65 paıyzdy quraıdy. Kásiporyn reseılik tutynýshylarmen turaqty jetkizilimder týraly kelissózder júrgizýde.
«Bul jyldyq óndiristik baǵdarlamalardy tolyqqandy josparlaýǵa múmkindik beredi. Qazirgi jóneltilimder toqsan sheginde, - dep atap ótti Artýr Beısegerımov. - 2017 jylǵa boljamdar jasalýda. 2016 jylǵa qaraǵanda kómir óndirýdi 17 paıyzǵa 480 tonnaǵa jýyq ulǵaıtý josparlanyp otyr. Óńdeýdi arttyrý kózdelgen - kontsentrat túrinde 300-340 myń tonnaǵa jýyq kómirdi óńdep, jóneltpekpiz. Energetıkalyq baǵdarlamalar boıynsha shaǵyn kólemder bar».
«Gefest» jumyskerleri úshin de jaǵymdy jańalyqtar bar. Bıyl olardyń eńbekaqysy 25-30 paıyzǵa kóterilmek. Kompanııa basshylyǵy jańa jumys oryndaryna 200 adam qabyldaıdy.
«Árıne kásiporynda qysqartýlar boldy, - deıdi basshy. - Búginde barlyq barlaý jáne servıstik kásiporyndar boıynsha jumyskerler sany 1 000 adam deńgeıinde turaqtady. Bir jyldyń ishinde 1 200 adamǵa jetkizbekpiz. Oǵan óńdeý qýattylyqtaryndaǵy personal sanyn arttyrý kiredi».
Sonymen qatar, «Gefest» 2017 jyly daǵdarys kezinde turalap qalǵan «Batys» shahtasynyń jobalaryn qaıta qolǵa almaq. 2018 jyly kompanııa atalǵan ýchaskede kómir óndirýdi qaıta bastamaq nıette.
Munymen qosa, 2007 jyldan beri jumys istemeı turǵan Baıjanov atyndaǵy shahtada konservatsııalaý boıynsha sharalar qabyldanyp jatyr. Kásiporyn ýákiletti organdardyń maquldaýyn kútýde.
