Daǵdarysqa qarsy tıisti qadamdar jasalady - Tımýr Jaqsylyqov

NUR-SULTAN. QazAqparat – Valıýta naryǵyndaǵy ahýal óte jyldam ózgerip jatyr. Bul týraly Ulttyq ekonomıka birinshi vıtse-mınıstri Tımýr Jaqsylyqov málim etti, dep habarlaıdy QazAqparat tilshisi.

«Ahýal (naryqtaǵy) óte jyldam ózgerip jatyr jáne onyń barlyǵy qazirgi kezde biz yqpal ete almaıtyn syrtqy saıası oqıǵalarǵa baılanysty. Biz tek oǵan áreket ete alamyz. Sondyqtan birinshi saýda-sattyq kezeńin kútip turmyz», - dedi T. Jaqsylyqov Májiliste tilshiler saýalyna jaýap bere otyryp.

Osy oraıda ol daǵdarysqa qarsy jospar bar ekenin jáne osy baǵytta tıisti qadamdar jasalatynyn aıtty.

«Ulttyq banktiń aqparaty jarııalandy, bul turǵyda UB-nyń tıisti reglamenti bar. Saýda-sattyq kezinde baǵam kúrt aýytqysa, Ulttyq bankte saýdany toqtatý quqy bar. Sonymen qatar Ulttyq bank ınterventsııalyq tetikti paıdalanatynyn jarııalady», - dedi vıtse-mınıstr.

Budan buryn habarlanǵandaı, Tımýr Jaqsylyqov aldaǵy ýaqytta valıýta baǵamy tepe-teńdik sıpatyna deıin tómendeıdi degen pikir aıtqan edi.

Aıta keteıik, Ulttyq bank «Qazaqstan qor bırjasy» AQ-men birlesip teńge – AQSh dollary valıýta juby boıynsha saýda-sattyq reglamentin ózgertý týraly sheshim qabyldady. Atap aıtqanda, 28 aqpanda saýda-sattyq Nur-Sultan qalasynyń ýaqyty boıynsha saǵat 15-00-de Frankfýrt aýktsıony formatynda ashylady.

«Bul sharalar ýaqytsha sıpatqa ıe, belgisizdiktiń joǵary dárejesin jáne syrtqy geosaıası faktorlar tarapynan valıýta naryǵyna jáne el ishindegi qarjylyq turaqtylyqqa kórsetiletin qysymdy barynsha azaıtý qajettiligin kórsetedi», - delingen habarlamada.