Daǵdarysqa qarsy sharalardyń arqasynda Almaty ekonomıkasy turaqtandy - ákim
ALMATY. QazAqparat - Daǵdarysqa qarsy sharalardyń arqasynda Almaty ekonomıkasy turaqtandy. Bul týraly qala ákimi Baqytjan Saǵyntaev búgin Ortalyq kommýnıkatsııalar qyzmetinde ótken brıfıng barysynda málim etti, dep habarlaıdy QazAqparat tilshisi.
Ákimniń habarlaýynsha, Memleket basshysynyń tapsyrmasyna sáıkes, qala turǵyndarynyń jumys orny men kiristerin saqtaý maqsatynda sharalar qabyldanǵan.
Ónerkásip, baılanys, qurylys salalarynda ekonomıkalyq ósim saqtalǵan. Mysaly, ónerkásip 4,3%-ǵa, qurylys 11,8%-ǵa, paıdalanýǵa beriletin baspana kólemi 3,6%-ǵa, baılanys qyzmetteri 8%-ǵa ósti.
2020 jyly megapolıstiń negizgi kapıtalyna 719,2 mlrd teńge ınvestıtsııalandy. Onyń basym bóligi jeke ınvestorlardyń qarajaty. Investıtsııalardyń negizgi bóligi jyljymaıtyn múlikke tıesili (44,9%) bolsa, qalǵan bóligi kelesi salalar boıynsha bólingen.
Ónerkásip (13,8%); kólik jáne qattaý (9,6%); Densaýlyq saqtaý jáne áleýmettik sala (6,2%); sondaı-aq qarjy jáne saqtandyrý qyzmetine (6%) bólindi.
Jyl qorytyndysy boıynsha Almatyda quny 176,2 mlrd teńge bolatyn 90 ınvestıtsııalyq joba iske asyrylyp, nátıjesinde 7,3 myń jańa jumys orny ashylady. Megapolıstiń negizgi kapıtalyna salynǵan ınvestıtsııalardyń jyldyq kólemi 900 mlrd teńgege baǵalanyp otyr.
2020 jyldyń 11 aıynyń qorytyndysy boıynsha memlekettik bıýdjetke jınalǵan salyqtar men tólemder ótken jyldyń osy kezeńine qaraǵanda 1%-ǵa kóp. Bul rette qalanyń memlekettik bıýdjet kiristerindegi úlesi 23,5-ten 25,7%-ǵa deıin ulǵaıdy.
«Daǵdarysqa qarsy sharalardy qabyldaý nátıjesinde qala ekonomıkasy turaqtandyryldy. Osylaısha, qala epıdemııadan keıin tez qalpyna kelip jatyr», - dep atap ótti B.Saǵyntaev.
3 jeltoqsanda onlaın-formatta ótken ınvestıtsııalyq forýmnyń nátıjeleri boıynsha 1,5 trln teńge somasyna 55 memorandým jasaldy.
