Daǵdarysqa qarsy sharalar jónindegi jedel shtab otyrysynda kólik jáne saýda máseleleri talqylandy
NUR-SULTAN. QazAqparat – Úkimet úıinde QR Premer-Mınıstri Álıhan Smaıylovtyń tóraǵalyǵymen Daǵdarysqa qarsy sharalar jónindegi jedel shtabtyń kezekti otyrysy ótti, dep habarlaıdy primeminister.kz.
Otyrysta kólik jáne saýda máseleleri qaraldy. Jedel sheshimdi talap etetin negizgi máselelerdiń biri – týyndaǵan kóliktik-logıstıkalyq problemalardy sheshý.
Premer-Mınıstr qazaqstandyq júkterdiń tranzıti boıynsha Ázerbaıjanmen jáne Grýzııamen kelissózder nátıjelerin eskere otyryp, jedel sharalar qabyldaýdy jáne balamaly kólik dálizderin paıdalaný múmkindigin qarastyrýdy tapsyrdy.
Osy oraıda Á. Smaıylov qazaqstandyq júkterdi tasymaldaý tarıfterin tómendetýdiń mańyzdylyǵyn atap ótti.
QR Premer-Mınıstriniń orynbasary B. Sultanovtyń aıtýynsha, bıznes ókilderiniń ótinishterin naqty pysyqtaý boıynsha jumys júrgizilip jatyr. Atap aıtqanda, tsement salasyndaǵy, jeńil ónerkásiptegi, akkýmýlıatorlar, kabel-ótkizgish ónimderin óndirýshi 16 qazaqstandyq kásipornynyń problemalyq máseleleri qaraldy.
Qazaqstandyq óndirýshi-eksporttaýshylardy qoldaý jáne yntalandyrý úshin Úkimet qajetti qarjylyq jáne servıstik qoldaý sharalaryn kórsetedi. Qazirgi ýaqytta 1,5 mln tonnadan astam azyq-túlik kóleminde áleýmettik mańyzy bar azyq-túlik taýarlarynyń jetkilikti qory qalyptastyryldy. Qazaqstan Respýblıkasy Saýda jelileri odaǵynyń aqparatyna sáıkes, saýda oryndaryndaǵy qor halyqtyń taıaý ýaqyttaǵy qajettiligin qamtamasyz etedi.
Óndiriste ımporttyq taýarlardy paıdalanatyn óndirýshilerdiń ekonomıkalyq belsendiligin qoldaý, sondaı-aq ishki naryqty azyq-túlikpen tolyqtyrý úshin Premer-Mınıstr ekonomıkaǵa áser etetin taýarlarǵa ımporttyq kedendik bajdardy alyp tastaý máselesin qarastyrýdy tapsyrdy.
Jedel shtabtyń kelesi otyrysy 10 naýryzda ótedi.
