Daǵdarysqa qarsy shara: Shaǵyn bıznesti qoldaýǵa 1 trln bólindi

NUR-SULTAN. QazAqparat - Bıyl shaǵyn jáne orta bıznesti qoldaýǵa qosymsha baǵyttalǵan qarjynyń jalpy kólemi - 1 trıllıon teńge. Bul týraly Ortalyq kommýnıkatsııalar qyzmetinde ótken onlaın brıfıngide aıtyldy, dep habarlaıdy QazAqparat tilshisi.

«Bıyl shaǵyn jáne orta bıznesti qoldaýǵa qosymsha baǵyttalǵan qarjynyń jalpy kólemi 1 trıllıon teńgeni quraıdy. Onyń 600 mlrd teńgesi Ulttyq bank tarapynan bolsa, 400 mlrd teńge «Qarapaıym zattar ekonomıkasy» baǵdarlamasy boıynsha bólindi», - deıdi QR Ulttyq ekonomıka mınıstri Rýslan Dálenov.

Onyń aıtýynsha, «Bıznes jol kartasy - 2020» aıasynda sýbsıdııalaý boıynsha qarjylandyrý eki esege artty.

«Sondaı-aq, Memleket basshysynyń tapsyrmasy boıynsha jańa baǵyt jasalýda. Bul – shaǵyn jáne mıkrobızneste júrgen kásipkerlerdi jeńildikti qarjylandyrý. Budan basqa, «Nurly jol», «Nurly jer», «Óńirlerdi damytý baǵdarlamasy», «Jumyspen qamtý jol kartasy» baǵdarlamalary aıasynda ınfraqurylymdyq jobalar júzege asyrylady. Munyń bári týra jáne janama túrde orta jáne kishi bıznes sýbektilerin qoldaıdy», - deıdi ol.

Eske sala ketsek, eldegi jumyspen qamtýdy jáne áleýmettik-ekonomıkalyq turaqtylyqty qoldaýǵa baǵyttalǵan daǵdarysqa qarsy sharalardy júzege asyrý úshin Úkimet 5,9 trln teńge bólgen.