Daǵdarysqa qaramastan elimizdegi 7-shi qysqy Azııa oıyndary óz deńgeıinde ótedi
Y. Qarashanyń 14-i. QazAqparat /Názıra Eleýhan/ - 2011 jyly Almaty men Astanada ótetin 7-shi qysqy Azııa oıyndaryna salynǵan nysandardyń qarjysy ǵımarattardy jalǵa berýden jáne bul sharanyń jarnamasynan birtindep bólip qaıtarylady.
Bul týraly Elbasy Nursultan Nazarbaev keshe tikeleı jeli arqyly Qazaqstan halqymen tildesý kezinde málim etti, dep habarlaıdy QazAqparat.
Qysqy Azııa oıyndaryna daıyndyq daǵdaryspen tuspa-tus kelgenin jetkizgen Nursultan Ábishuly qıyndyqqa qaramastan onyń óz deńgeıinde ótetinin aıtty. Bul máselege oraı Prezıdent jyl basynda Almatyǵa kelgen kezinde Úkimetke tapsyrma bergen bolatyn.
«Almaty qalasyndaǵy tramplın kesheni óz ýaqytynda salynady. Sonymen qatar, búkil álemge tanymal «Medeý» muz aıdyny, B.Sholaq atyndaǵy sport saraıy da ýaqytynda qaıta jóndeýden ótedi. Astanada Medeý muz aıdyny sııaqty, tóbesi jabyq 30 myń oryndyq muz saraıy salynatyn bolady», dedi Elbasy.
