Daǵdarysqa qaramastan bilim salasyna bólingen qarajat 16 esege ósti - Almaty ákimi Ahmetjan Esimov
ALMATY. Tamyzdyń 25-i. QazAqparat /Názıra Eleýhan /- Ústimizdegi jyly qalalyq basqarma bıýdjeti 29,5 mıllıard teńgeni qurady. Bul ótken jylmen salystyrǵanda 4 mıllıard teńgege artyq.
Al, bilim salasyna bólingen qarajat, daǵdarysqa qaramastan 16 esege ósti. Bilim salasy qyzmetkerleriniń jalaqysy 2009 jyly 20 paıyzǵa ósse, bıylǵy jyldyń sáýir aıynan bastap 25 paıyzǵa kóterildi, 2011 jyly taǵy da 30 paıyzǵa kóterý josparlanýda. Bul týraly búgin Almatyda ótken bilim berý qyzmetkerleriniń tamyz keńesi barysynda Almaty qalasynytsń ákimi Ahmetjan Esimov aıtty, dep habarlaıdy QazAqparat.
"Bul qarajat mektepterdiń materıaldyq-tehnıkalyq jaǵdaıyn edáýir jaqsartýǵa jáne jańa bilim nysandaryn qoldanýǵa múmkindik berdi. Atap aıtqanda, 3 mektep pen 7 jańa balabaqsha qoldanysqa berildi. Bıylǵy jyly qyrkúıek aıynda taǵy da 2 balabaqsha paıdalanýǵa beriledi. Al, Elbasy tapsyrmasy boıynsha, "Jol kartasy" baǵdarlamasy aıasynda ótken jyly 20 bilim berý nysandary qaıta jóndeýden ótse, bıyl 11 oqý ǵımaraty jóndeldi", dedi ol. Ákimniń aıtýynsha, Almaty kóp jaǵynan elimizdegi bilim salasynda jetekshi ortalyq bolyp qalýda. "Onyń dáleli retinde bizdiń qala oqýshylarynyń respýblıkalyq jáne ǵylymı jobalyq jarystarda kórsetken tabysty jetistikterin aıtýǵa bolady, sondaı-aq, bıyl jaqsy kórsetkish kórsetken UBT nátıjesin aıtqym keledi. Almaty qalasy ótken jyly bul synaqta 8 orynda bolsa, bıyl 3-shi orynǵa shyqty. Ol kóp nárseni bildiredi", dep atap ótti Ahmetjan Esimov.
Qala ákiminiń aıtýynsha, búginde qalada 181 mektep, 175 balabaqsha, túrli deńgeıdegi jáne menshiktegi 169 oqý orny bar. "Búginde qalanyń 70 mektebi ınnovatsııalyq ádispen oqytýdy engizýdiń synaq alańy bolyp tabylady. Al, mektepterdiń 74-i jańa tıptegi mektep", dedi ol.
Almaty ákimi, jıyn barysynda qalanyń bilim berý júıesine birneshe mindetter júktedi. "Almaty qalasyndaǵy 20-dan asa kásiptik-tehnıkalyq orta bilim men kolledjderde kadrlardy daıyndaý sapasyn arttyrý qajet. Olar, eńbek naryǵynyń qajettiligine jaýap bere alatyndaı bolýy kerek. Barlyq bilim alý oshaqtarynda qazaq tiliniń oqytylýyna basa nazar aýdarý qajet. Eń basty mindet - tárbıeli, ıntellektýaldy, mádenıetti, óz qalasy men qorshaǵan ortany súıetin, salaýatty ómir saltyn qurýǵa talpynatyn balany tárbıelep ósirý qajet", dep atap ótti qala basshysy.
Ahmetjan Esimov keńes barysynda Úkimet tarapynan bilim salasyna erekshe nazar aýdarylatyndyǵyn aıta kelip, "87 muǵalim memlekettik baǵdarlama boıynsha páter alsa, "100 mektep, 100 emhana" baǵdarlamasy boıynsha, 60 pedagog páterli boldy. Kelesi jyldyń ortasyna deıin, biz 260 muǵalimge páter kiltin tabystaýdy josparlap otyrmyz", dedi.
