Daǵdarysqa baılanysty Balqash JES jobasyn qaıta qaraý kerek - Bıshimbaev
ASTANA. QazAqparat - Búgin QR Parlamenti Májilisinde ótken úkimet saǵatynda QR Ulttyq ekonomıka mınıstri Qýandyq Bıshimbaev Balqash JES pen "Samsung" kompanııasy arasynda týyndaǵan jaǵdaı týraly aıtyp berdi.
"Balqash JES boıynsha, kelissózder qazir ótkizilýde. Samsung kompanııasymen qaıtadan kelisýge eki aıdaı ýaqyt bar. Bizdiń mınıstrlikti bul joba boıynsha alańdatatyn másele - keleshektegi tarıfter. Óıtkeni bul stansanyń qurylysy keleshektegi tarıfterdiń ulǵaıýyna úlesi óte joǵary dep oılaımyn. Sondyqtan tarıfterdi qaıtadan qarap, sol kelissózderdi arqyly tarıfterdi jańartý, álde tómendetý joldary men múmkindikterin qaraý kerek. Bizdiń ustanymymyz osyndaı", - dedi mınıstr.
Onyń aıtýynsha, jobadan Samsung kompanııasynyń bas tartýy qazaqstandyq taraptyń kinási emes.
"Bul qatelik emes, bul - ózgergen ekonomıkalyq jaǵdaıda jobaǵa jańa kózqaraspen, jańa jaǵdaımen qarap jáne sol boljaǵan parametrlerdi qaıtadan taldaý, zertteý. Sol jumystar osy eki aıda kelisiletin bolady", - dep atap ótti Q. Bıshimbaev.
Aıta keteıik, bunyń aldynda Samsung C&T Sorporation kompanııasy Balqash JES qurylysynan bas tartqan bolatyn. Atalmysh aqparatty QR Energetıka mınıstrligi rastady.
«Samuryq-Energo» AQ habarlamasyna sáıkes, Samsung C&T Sorporation kompanııasymen birge jobany aıaqtaý boıynsha túbegeıli sheshim áli shyǵarylǵan joq. 2016 jyldyń 31 tamyzynda Samsung C&T Sorporation-nan «Balqash JES» AQ aktsııalaryn qazaqstandyq tarappen satyp alýyn talap etetin satylym optsıonyn atqarý týraly, sonymen qatar Samsung Engineering Co Ltd kompanııasynan qurylysty júrgizý týraly kelisimshartty buzý týraly habarlama kelip tústi», - delingen «QazAqparat» agenttiginiń resmı saýalyna berilgen jaýapta.
Mınıstrliktiń jazýynsha, kelisimshart talaptaryna sáıkes, qazaqstandyq tarapta 60 kún ishinde koreılik ınvestorlarmen qarym-qatynasty retteýge múmkindik bar.
