Daǵdarys kezinde de kórermenniń kózaıymyna aınalatyn kınolar shyǵa beredi - Asanáli Áshimov

Kınofestıval jyldan jylǵa aldyǵa qaraı úlken qadam jasap, belsendi baǵyt ustap keledi. Bul týraly búgin Almatyda kınofestıvaldiń ashylý saltanatyna oraı ótkizilgen baspasóz máslıhatynda T.Júrgenov atyndaǵy Qazaq Ulttyq óner akademııasynyń rektory, fılosofııa ǵylymdarynyń doktory Arystanbek Muhamedıuly málimdedi, dep habarlaıdy QazAqparat.

Onyń aıtýynsha, bul kınofestıval - jas kınogerlerge qoldaý kórsetetin shara.

«Jer betine kóktem keldi, ol degenimiz festıval keldi, ıaǵnı alys-jaqyn shet elderden kelgen jas kınematografısterdiń basy qosylyp, kezdesýleri ótedi degen sóz. Kıno salasynyń eń úzdik mamandary óz jumystaryn kórsetip, halyqaralyq deńgeıdegi jarystarǵa túsýge múmkindik alady. Biz esh nársege, tipti daǵdarysqa qaramastan aldyǵa qaraı júrip kelemiz jáne durys baǵytpen kelemiz. Bul festıval eń aldymen - jas talanttar baıqaýy. Sondyqtan, bıylǵy jyly da jańa esimderdiń ashylatyndyǵyna jáne bul festıval kınematografısterdi jańa izdenisterge yntalandyratyna kúmánim joq», dedi Almaty Halyqaralyq kınofestıvaliniń Bas dırektory Venera Nyǵmatýllına. Onyń aıtýynsha, bıyl halyqaralyq kınofestıvaldiń merzimi 5 kúnnen 3 kúnge qysqartylǵanymen, baǵdarlama deńgeıi men sapasy sol qalpynda qalǵan.

Baspasóz máslıhaty barysynda «Sháken juldyzdary» Halyqaralyq kınofestıvaliniń prezıdenti, KSRO jáne Qazaqstannyń halyq ártisi Asanáli Áshimov: «Kıno ómir boıy daǵdarysta, soǵan qaramastan qanshama tamasha týyndylar dúnıege keldi. Sondyqtan, daǵdarys kezinde de kórermenniń kózaıymyna aınalatyn kınolar shyǵa beredi», dep atap ótti.

Festıvaldiń uıymdastyrý komıtetine bıylǵy jyly 30 memleketten 240 ótinish kelip túsken. Onyń 35-i iriktelip alanyp, festıvalge «Debıýt», «Jastar kınosy», «Halyqaralyq panorama», «Aqparattyq kórsetilim» atalymdary boıynsha qatystyrylady. Bulardyń 5-i qazaqstandyq fılmder.

Búgin keshke Respýblıka saraıy aldyndaǵy Abaı alańynda kınofestıvaldiń resmı túrde ashylýy ótedi.