Dabyl túımesin basyp, polıtsııa qyzmetkerlerin mazalaýǵa týra keldi - Ashat Aımaǵambetov

ASTANA. QazAqparat – Jetisý oblysy Saryózek aýylynyń turǵyndarymen kezdesken Oqý-aǵartý mınıstri dabyl túımesin basyp, polıtsııa qyzmetkerlerin mazalaýǵa týra kelgenin málimdedi. Bul týraly mınıstr áleýmettik jelidegi paraqshasynda jazdy, dep habarlaıdy QazAqparat.

«Mádenıet úıine 320 adam jınaldy. Turǵyndarmen tildesip, suraqtaryna jaýap bergende olardyń jańa oblystyń qurylǵanyna óte rıza ekenin baıqadym. Esep berý kezdesýi eki saǵatqa jýyq ýaqytqa sozyldy. Jıynda atqarylyp jatqan jumystar jaıynda aıtyp, aýyl turǵyndarynyń suraqtaryna jaýap berýge kóbirek ýaqyt bólýge tyrystym. Ata-analardy, áriptes muǵalimderdi, mektep dırektorlaryn alańdatqan máseleler – muǵalimderdiń saǵat júktemesi, dırektorlardyń rotatsııasy, túlekterdi jumysqa ornalastyrý, mektepterdiń áleýetin arttyrý, kolledj bilimine granttardy bólý tetigi», - dep jazady Ashat Aımaǵambetov.

Esep berý kezdesýinen keıin mınıstr aýyldaǵy Kúreńbel mektebi men «Aı-Sana» balabaqshasynda bolǵan.

«900 orynǵa eseptelgen mektepte 875 bala oqyp jatyr. Birinshi kezekte qaýipsizdik jumysynyń qalaı uıymdastyrylǵanyn, beınebaqylaý kameralarynyń jáne «dabyl túımeleriniń» jumysyn, t.b. kórdim. Dabyl túımesin basqannan keıin mektepke jedel jetken polıtsııa qyzmetkerlerin mazalaýǵa týra keldi, biraq oqýshylardyń qaýipsizdigi óte mańyzdy», - deıdi mınıstr.

Balabaqshadaǵy kezdesýde tárbıeshiler mektepterdegi pedagog-assıstent laýazymy sııaqty tárbıeshi-assıstent qyzmetin engizý múmkindigi jaıly suraǵan. Vedomstvo basshysynyń aıtýynsha, bul másele sheshilip jatyr.

Foto: facebook.com/askhat.aimagambetov