Dabyl: Astanada qulaqtandyrý júıeleri tekseriledi
ASTANA. QazAqparat - 23-31 shildede elorda ákimdigi Tótenshe jaǵdaılar departamentimen birlesip, tele-radıo arnalardyń kómegimen, elektr dabyldaryn qosý arqyly Astana qalasynyń qulaqtandyrý júıelerin tekserýin júrgizedi, dep habarlaıdy elorda ákimdiginiń resmı saıty.
Tótenshe jaǵdaılar departamentiniń qyzmetkerleri elorda turǵyndary men qonaqtaryn sabyrlyq saqtaýǵa, úreılenbeýge shaqyrady.
«Tótenshe jaǵdaı oryn alǵan kezde nemese tótenshe jaǵdaıdyń oryn alýyna qaýip tóngen kezde elektr dabyldary nemese basqa da dabyl quraldary qosylady, ol «Barshańyzdyń nazaryna!» biryńǵaı qulaqtandyrý dabylyn bildiredi. Belgili bir jaǵdaıda jasalatyn is-áreketter týraly aqparattar men nusqaýlyqtardy alý úshin bul dabyldy estigen kezde turǵyndar mindetti túrde qolaıly aqparat quraldaryn qosýy kerek», - delingen taratylǵan habarlamada.
