Dabyl: JI-di oqytý úshin Germanııadaǵy antıkvarlyq kitaptar joıylyp jatyr
ASTANA. KAZINFORM – Germanııadaǵy antıkvarlyq kitap dúkenderi jasandy ıntellektini ázirleýshilerdiń sırek basylymdardy jappaı satyp alýyna baılanysty dabyl qaǵyp otyr. Kóptegen kitap tsıfrlandyrylǵannan keıin bólshektelip, joıylyp ketedi, dep habarlaıdy DW.
Germanııada sırek antıkvarlyq basylymdardy satatyn kitap dúkenderinde kútpegen suranys artqan. Jasandy ıntellekt salasynda jumys isteıtin kompanııalar tildik modelder men chat-bottardy oqytý úshin mundaı kitaptardy kóptep satyp alyp jatyr.
Nemis antıkvarlyq kitap satýshylary bul jaǵdaıdy arnaıy forýmdarda talqylap jatyr. Olardyń aıtýynsha, keıbir dúkenderge jyldyq tabysyna teń kólemde tapsyrys túsken. Sonymen qatar birneshe jyl boıy eshkim qyzyqpaǵan basylymdar da jańa ıelerin tapqan. Tapsyrystardyń basym bóligi kanadalyq-amerıkalyq Zoom Books kompanııasynan túsedi.
Suranys negizinen ǵylymı-kópshilik jáne akademııalyq ádebıetterge baǵyttalǵan, al kórkem shyǵarmalar sırek satyp alynady. Shveıtsarııalyq SRF medıakompanııasynyń málimetinshe, jasandy ıntellekt ázirleýshileri ınternette joq tarıhı tildik erekshelikter men stıldik ózgeshelikterdi qamtıtyn óńirlik tarıh, til bilimi, quqyqtaný jáne ekonomıka jónindegi eski kitaptardy arnaıy izdeıdi.
Mıllıondaǵan kitap tsıfrlandyrylyp jatyr
Byltyr qańtarda The Washington Post gazeti jasandy ıntellekt júıeleri ınternettegi ashyq qoljetimdi barlyq tsıfrlyq mátinderdi óńdep qoıǵanyn jazǵan. Sondyqtan ázirleýshiler endi qaǵaz kitaptardy tsıfrlandyrýǵa kóshken.
Basylymnyń málimetinshe, amerıkalyq Anthropic kompanııasy «Panama» atty qupııa joba aıasynda jasandy ıntellekt modelderin oqytý úshin mıllıondaǵan baspa kitabyn satyp alyp, skanerlegen. Protsesti jyldamdatý úshin kitaptardyń muqabasy kesilip alynyp, bul olardyń is júzinde joıylýyna ákelgen.
Keıin Kalıfornııadaǵy kompanııa avtorlyq quqyqty buzdy degen aıypqa ilindi. Alaıda sot daýyn retteý úshin 1,5 mıllıard dollar tóleýge kelisken.
Berlındegi kitap dúkenderiniń biriniń ıesi Ýrban Tserfas Norddeutscher Rundfunk medıakompanııasyna bergen suhbatynda antıkvarlyq basylymdarǵa degen qyzyǵýshylyqty «altyn bezgegimen» salystyrdy.
Onyń aıtýynsha, kitap satýshylar qundy basylymdardyń satyp alynǵannan keıin joıylǵanyn qalamaıdy. Tserfas Germanııa kitap saýdasy bırjalyq odaǵy men saıasatkerlerdi osy máselege nazar aýdarýǵa shaqyryp, mundaı tájirıbeni avtorlyq quqyqtyń buzylýy dep baǵalady.
Eske sala ketsek, Qazaqstan álemdik deńgeıdegi jasandy ıntellekt klasterin qurýdy josparlap otyr.
Al Astanada jasandy ıntellekt negizinde jumys isteıtin jańa tsıfrlyq keńse ashyldy.
