D jáne E sanatyndaǵy otbasy sanyn azaıtý boıynsha ákimderdiń reıtıngisi ázirlenedi
ASTANA. KAZINFORM – Tsıfrlyq karta negizinde D jáne E sanatyndaǵy otbasy sanyn azaıtý boıynsha ákimderdiń reıtıngisi ázirlenedi. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
- 2022 jylǵy 1 qyrkúıekten bastap Tsıfrlyq karta arqyly proaktıvti formatta járdemaqylar men áleýmettik tólemder taǵaıyndalady. 2024 jyldyń basynan beri 1,3 mln adamǵa qyzmet kórsetý jóninde SMS habarlama jiberildi. Oǵan jaýap bergen 561 myń adamǵa qyzmet proaktıvti túrde kórsetildi. Sonymen qatar Tsıfrlyq karta memlekettik organdar men ákimderge óńirdiń áleýmettik-ekonomıkalyq damý baǵdarlamalaryn ázirleý kezinde taldaý júrgizýge múmkindik beredi, - dedi Oljas Bektenov.
Úkimet basshysynyń atap ótýinshe, Tsıfrlyq karta negizinde D jáne E sanattaryndaǵy otbasylar sanyn azaıtý boıynsha ákimderdiń reıtıngisi (kedeılik, jumyssyzdyq, halyqtyń jasyryn jumyspen qamtylýy, otbasylardyń áleýmettik ál-aýqaty deńgeıi jáne t.b.) ázirlenip jatyr.
- Atalǵan reıtıngke monıtorıng júrgizý úshin Tsıfrlyq karta derekterin júkteý fýnktsıonaly iske asyryldy. D jáne E sanatyn tómendetý úshin ákimderge aqparattyq júıelerde adamdardyń derekterin (MÁMS júıesimen qamtý, balalardyń balabaqshalar men mektepke tirkelýiniń bolmaýy; NEET jastar sany jáne t.b.) ózektendirý jumysyn júrgizýge múmkindik beredi. Osylaısha, memlekettik organdardyń aqparattyq júıelerindegi málimetterdi ózektendirý boıynsha jumystar jalǵasýda, - dedi Premer-Mınıstr.
Aıta keteıik, otbasynyń (adamnyń) áleýmettik salamattylyǵyn aıqyndaý ádistemesine sáıkes, Tsıfrlyq karta ekonomıkalyq, áleýmettik jáne turǵyn úı jaǵdaılary, densaýlyq saqtaý, bilim berý boıynsha otbasynyń ál-aýqat deńgeıin baǵalaıdy jáne otbasylardy 5 sanat (A – jaqsy deńgeı, V – qanaǵattanarlyq deńgeı, S - tómen deńgeıde, D – daǵdarys deńgeı, E-múshkil deńgeı) boıynsha bóledi.
Buǵan deıin ataýly áleýmettik kómekke ótinish bergen azamattardan kiristeri men shyǵystaryn tekserýge kelisiminalý tetigi engiziletindigin jazǵan edik.