Dıachenkonyń jarqyn beınesi halyqtyń júreginde árdaıym saqtalady - Nyǵmatýlın
ASTANA. QazAqparat - S.Dıachenkonyń jarqyn beınesi halyqtyń júreginde árdaıym saqtalady. Bul týraly búgin Astanada kórnekti memleket qaıratkerin sońǵy saparǵa shyǵaryp salý rásiminde QR Parlamenti Májilisiniń tóraǵasy Nurlan Nyǵmatýlın málim etti, dep habarlaıdy QazAqparat.
Májilis tóraǵasy S. Dıachenkonyń ómir jolyna jekeleı toqtalyp ótti. Spıker osy rette marqumnyń memleket aldyndaǵy eren eńbegi umytylmaıtyndyǵyn aıta kele, Dıachenkonyń Májilistegi qyzmetimen qazaqstandyq parlamentarızmniń damýynyń erekshe mańyzdy kezeńi baılanysty ekenin jetkizdi.
Osydan keıin N. Nyǵmatýlın Prezıdent Nursultan Nazarbaevtyń memleket qaıratkeri Sergeı Dıachenkonyń qaıtys bolýyna baılanysty týǵan-týysqandary men jaqyndaryna kóńil aıtý jedelhatyn oqyp berdi. Onda ol Otanymyzdyń naǵyz patrıoty retinde óziniń bar oıy men atqarǵan isin Qazaqstan Respýblıkasynyń ıgiligi jolyna arnaǵandyǵy atap ótilgen.
Búginde S.Dıachenkonyń týǵan-týysqandary men jaqyndaryna kóńil aıtý jedelhattary Qazaqstannyń, sondaı-aq sheteldiń kóptegen tanymal memleket jáne qoǵam qaıratkerlerinen kelip jatyr.
Sergeı Aleksandrovıchti aqtyq saparǵa shyǵaryp salýǵa Parlament depýtattary, memleket jáne qoǵam qaıratkerleri, elorda jurtshylyǵy keldi. Sonymen qatar qoshtasý rásimine Prezıdent Ákimshiliginiń basshysy Ádilbek Jaqsybekov, QR Іshki ister mınıstri Qalmuhanbet Qasymov, Astana ákimi Áset Isekeshev, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov jáne basqalary qatysýda.
Budan buryn habarlanǵandaı, memleket qaıratkeri Sergeı Dıachenkonyń súıegi Ulttyq panteon aýmaǵynda qoıylady.
